Ուկրաինան պատրաստվում է իր տարածքում թուրքական Bayraktar անօդաչուներ արտադրել
Ուկրաինան պատրաստվում է իր տարածքում թուրքական Bayraktar անօդաչուներ արտադրել, այս պահին փնտրվում է տարածք՝ համապատասխան արտադրությունը կազմակերպելու համար: Военное обозрение թերթի տեղեկացմամբ, այս մասին հայտնել է Ուկրաինայի ռազմավարական ոլորտների արդյունաբերության հարցերով փոխվարչապետ Օլեգ Ուրուսկին:
«Թուրքական կողմը պատրաստ է ներդրում անել: Նրանց մեզնից պետք է համապատասխան պահանջներով հարթակ, որտեղ իրենք կկառուցեն ձեռնարկությունը, որն էլ հետագայում կարտադրի այդ սարքերը»,- նշել է նա:
Ուրուսկու խոսքով՝ ձեռնարկությունում կաշխատեն ուկրաինացի ինժեներներ և այլ աշխատողներ, իսկ հենց ձեռնարկությունն իրավունք կստանա վաճառել անօդաչուներ ինչպես ուկրաինական, այնպես այլ շուկաներում:
Բացի դրանից, Կիևն ու Անկարան քննարկում են մի քանի համատեղ ձեռնարկությունների ստեղծման հնարավորությունը, որտեղ կարտադրեն հակատանկային հրթիռային համակարգեր, ավիացիոն շարժիչներ անօդաչուների, ուղղաթիռների և ինքնաթիռների համար: Ուսումնասիրվում է նաև մի շարք թուրքական նավերի կառուցման տարբերակն Ուկրաինայի համար:
