Պուտինն ու Մակրոնը կոչ են արել դադարեցնել կրակը Լեռնային Ղարաբաղում
Ռուսաստանի և Ֆրանսիայի նախագահներ Վլադիմիր Պուտինը և Էմանուել Մակրոնը հեռախոսազրույցի ընթացքում քննարկել են իրավիճակը Լեռնային Ղարաբաղում և Բելառուսում: Այս մասին հաղորդում է Կրեմլի մամուլի ծառայությունը:
Հեռախոսազրույցը տեղի է ունեցել ֆրանսիական կողմի նախաձեռնությամբ: Ինչպես նշվել է Կրեմլում, երկու պետությունների ղեկավարները «հիմնովին դատապարտել են Լեռնային Ղարաբաղի հակամարտության գոտում իրավիճակի կտրուկ սրումը, ինչպես նաև անհանգստություն են հայտնել ընթացող ռազմական գործողությունների կապակցությամբ»:
Պուտինը և Մակրոնը հակամարտության կողմերին կոչ են արել շուտափույթ և ամբողջական հրադադար և լարվածության լիցքաթափում: «Նշվել է, որ Լեռնային Ղարաբաղի ճգնաժամի քաղաքական և դիվանագիտական մեթոդներով կարգավորումը այլընտրանք չունի: Այս համատեքստում դիտարկվել են հետագա համագործակցության հատուկ ձևաչափեր, առաջին հերթին ԵԱՀԿ Մինսկի խմբի ձևաչափը»,- ասված է Կրեմլի հայտարարության մեջ:
Բացի դրանից, Ռուսաստանի և Ֆրանսիայի ղեկավարները կրկին քննարկել են Բելառուսում տիրող իրավիճակը, միևնույն ժամանակ Պուտինը վերահաստատել է «սկզբունքային դիրքորոշումը ինքնիշխան պետության ներքին գործերին միջամտելու ցանկացած փորձի և օրինական իշխանությունների վրա արտաքին ճնշման անթույլատրելիությունը»:
