Մի՛ սպասեք պատմությունը ձեզ ՈՒԺԵ՛Ղ ԱՊՏԱԿ հասցնի, որ նոր զգաստանաք
Առաջնորդ լինելը անուն, պաշտօն կրել կամ աթոռ զբաղեցնել չի նշանակում, այլ կեանքի օրինակով ու բառի իմաստով ծառայ լինելը այն ժողովուրդին, որին առաջնորդում են։ Առաջնորդ լինել նշանակում է լրջագոյն դէմք ու խոնարհ ծառայ լինել երկրին, ու այդ երկրի ժողովուրդին գերագոյն շահերին, եւ ոչ թէ դարաւոր թշնամի հարեւանների շահերին։
Մարդու լաւապէս ճանաչելու համար, պէտք է նրան պաշտօն տաս։
Երբ նայենք աշխարհի մեծագոյն ու անուանի դէմքերին, կը տեսնենք թէ նրանք չարչարուել են, տանջուել իրենց երկրաշինութեան համար ղեկավար լինելուց առաջ, ու մանաւանդ նաեւ ԵՏՔԸ։ Կը տեսնենք թէ ազգեր զօրանում են եւ նորանոր ձեռքբերումներ ունենում, երբ առաջնորդ դէմքը ԻՄԱՍՏՈՒԹԻՒՆԸ ունի իր ժողովուրդին բոլո՛ր շերտերով, բոլո՛ր տարբերութիւններով, բոլո՛ր քաղաքական մտածողութեամբ մարդկանց հաւաքելու, համախմբելու։ Քաջալերելու իր ընդդիմախօսներին, առաջնորդին յատուկ խոնարհութիւն դրսեւորելու։ Ազգային անձեռնմխելի տարրերին՝ ինչպիսին են հայրենի հողը, ձեռք բերուած սահմանները, հաւատքն ու եկեղեցին, ազգային մշակոյթը, ազգային աւանդական մտածողութիւնը ու արժէհամակարգին ձեռք չտալու, մատով իսկ չկպնելու, այլ աչքի լոյսի նման պահպանելու դրանք։ Ու մանաւանդ ծուլութեան կամ այլոց պիտակաւորման փոխարէն, լուրջ ու սիրով, հոգով անցնել գործի։
Այդ է յաջողութեան բանալին, որ խնդիրների լուծման ուղին, որն ցաւօք, մինչ օրս բացակայում է մեր ներկայ ղեկավար դէմքերից շատ-շատերի մօտ։
Մեր հնագոյն ու իմաստուն ժողովուրդը շատ ձեռքբերումներ ունի, շատ տաղանդներ, շատ իմաստուն դէմքեր, շատ նուիրեալ անձեր։ Ցաւալին այն է որ նրանցից արժանաւոր ծառան ընտրելու գործում գրեթէ ՄԻՇՏ ձախողում է, որովհետեւ ընտրութիւնը կատարում է զգացմունքով, փորի պահանջքով եւ ամբոխամտութեան ազդեցութեամբ, եւ ոչ թէ մտքով, խելքով, ազգային տեսլականով եւ ազգային պատմութեան խորանին զոհագործուելու պատրաստակամ մարդ, եւ ոչ թէ այլոց զոհելու։ Հողի աւիւնով աճած ու պատերազմի ու խաղաղութեան հաւասարակշռութիւնը ունեցող ծանրակշիռ, լուրջ, ծառայութիւն մատուցած դէմք, եւ ոչ թէ փողոցի անկիւնը գոռացող ամէն ձայնին բերէք-դնէք իշխանութեան գլուխ։
Հայրենիքը փորձարկումների (էքսպերիմենտների) դաշտ, ու այս կամ այն վարչապետ-նախագահին մենաշնորհեալ երկիրը չէ։ Երկիրը պէտք է լինի բացարձակապէս ՍԱՀՄԱՆԱԴՐՈՒԹԵԱՆ եւ ՕՐԷՆՔի գերակայութեան երկիր, եւ ոչ թէ այս կամ այն վարչապետին, անձին, կամ իր ընտանիքի քմահաճոյքներին կամ ըստ օրուան մտածումների ենթակայ խաղալիքը։ Եթէ ղեկավարներ լուրջ չեն ձեր պահանջների ու կարիքների հետ, ուրեմն մեղքը նրանցը չէ, այլ զիրենք այդ պաշտօնին վրայ հասցուցած ու ապա «ի վերին ցորենոյն» ուսերի վրայ տեղ հասցրած, անտարբեր թողած, ու միայն խօսքերով ընդվզում արտայայտող, խաբուած ժողովուրդին։
Եթէ խօսքերով փիլաւ եփուէր, կաթսայի ու աշխատանքի կարիք չէր լիներ։ Իսկ երկիր կառուցելը եւ պահպանելը խօսքի պահ չէ։ Յոգնած ենք բոլոր խօսքերից, ու սայլը տեղից չի շարժւում ու պիտի չշարժի ձեր համար։ Սովորէք ԳՈՐԾԵՐՈՎ տէր կանգնել ձեր երկրին։
Պէտք է սովորենք վերջապէս լրջանալ։ Թշնամիները՝ այսինքն Թուրքն ու Ադրբեջանցին, ոչ թէ միայն ձեզ շրջապատել են, այլ անցել են Հայութեան դէմ համընդհանուր պաղ պատերազմի Արցախում, Իրանում, Լիբանանում, Սիրիայում, Եւրոպայում, Ռուսաստանում եւ Ամերիկայում, ամբողջ հայութեան եւ ՀԱՅ անուան դէմ, երբ դուք հին բիւզանդական աւանդութեամբ, դեռ փորձում էք որոշել թէ քանի անկարող «հրեշտակ» կարող է պաշտօն ունենալ կամ նշանակուել ձեր ԱԱԾ-ում, Ազգային Ժողովում, Բանակում, եւ այլ կարեւոր դիրքերի ասեղների ծայրերին, երբ թշնամիներիը բացայայտ անցել են Ռուբիկոնը, շրջապատել են ձեզ ու ձեր «Կոստանդնուպոլիսը»։ Եթէ լուրջ ենք կեանքի եւ գոյութեան նկատմամբ, վստահ եմ որ ձեր տան վրայ պահակ չէիք կարգի անլուրջ, անհաւասարակշիռ ու կասկածելի օրակարգով մարդկանց, ո՜ւր մնաց նրանց կարգէիք վտանգուած հայրենիքի ներսի ու դրսի պաշտպանութեան գործում։
Ի վերջոյ, այս ժողովուրդը պէտք է ամբո՛ղջովին ԶԳԱՍՏԱՆԱՅ։ Պատմութիւնը ուժեղ ապտակներ հասցրեց մեր նախորդ սերունդներին, նրանց կատարած ահռելի սխալներին ու մանաւանդ անարժան ու անկարող դէմքերին անձնասիրութեան ու բաժանարարութեան պատճառով։ Մի՛ սպասէք որ պատմութիւնը ձեզ ՈՒԺԵ՛Ղ ԱՊՏԱԿ հասցնի որ նոր զգաստանաք….։ Այս հայրենիքը որբի գլուխ չէ՛, եւ ամէն մարդ չէ որ կարողութիւնը ունի մեր նման վտանգուած հայրենիք ղեկավարելու։ Պէտք է գօտեպնդուի ամէ՛ն հոգի, ամէ՛ն սիրտ, ամէ՛ն մարդ այն իմաստով որ եթէ յաջողութիւններ ՉԵՆ արձանագրւում ամէն բնագաւառի ու ճակատի վրայ, ուրեմն պէտք չէ վախենալ կամ ամաչել թէ առանց յապաղումի փոփոխութեան ժամանակը հասած է։ Այդ մարդիկ երկրի ղեկավար չեն կարգուել իրենց «սիրուն աչքերի» համար, այլ երկրի գերագոյն շահերը ԱՄԷՆ ՈՒԺՈՎ առաջ մղելու, թշնամիների աչքերը հանելով, եւ իրենց ԱՆՁԵՐԸ ՈՒՐԱՆԱԼով, երկրի ու ժողովուրդին ծառան լինելու, բառին բուն ու ամբողջական իմաստով։
Մարդիկ յաւիտենական չեն. եկել են, ու պիտի՛ գնան։ Անկասկա՛ծ պիտի գնան։ Շատեր գնում են դէպի անմահութիւն, իսկ ուրիշներ՝ պատմութեան աղբանոցը…։ Յաւիտենականը ՀԱՅՐԵՆԻՔՆ է իր ԲՈԼՈՐ սահմաններով, իհարկէ միայն ԱՍՏՈՒԾՈՅ առաջնորդութեամբ ու ժողովուրդին կամքով։
Յաջորդ անգամ երբ առաջնորդ էք ընտրում, կը խնդրեմ, որ դադարէք երեխաների նման հաւատք ընծայել ամէն աջից, ձախից տրուած սին ու յիմար խոստումներին, դրամական պարգեւ (աւելի ճիշդը կաշառքներին), ստախօս դէմքերին, մանաւանդ արեւմուտքի խոհանոցներում պատրաստուած կասկածելի ու անծանօթ «ճաշեր»-ին, ու իմանաք որ ձեր երկիրը չէք պահում միայն այս սերունդին համար, միայն ձեր զզուելի փորին, անձին ու գրպանին համար, ձեր աւտոներին ու տներին համար։ ԶՈՀՈՒԵԼ սովորէք, տղամարդ եղէք։ ՀԱՅՐԵՆԻՔԸ պահում են ամբողջական ու ուժեղ ու նաեւ ԱՒԵԼԻ ընդլանուած, մեծացած, հզօրացած ՅԱՋՈՐԴՈՂ սերունդներին համար, որոնք կարող են ձեզ օրհնել, կամ անիծել, ըստ ձեր այսօր կատարած գործերին…։
Դուք ընտրեցէք…։
Տ. Սերոբ Քահանայ
Ամերիկաբնակ քահանա Serop Azarian-ի ֆեյսբուքյան էջից
Առաջնորդ լինելը, անուն, պաշտօն կրել, կամ աթոռ զբաղեցնել չի նշանակում, այլ կեանքի օրինակով ու բառի իմաստով ծառայ լինելը…
Опубликовано Serop Azarian Суббота, 13 июня 2020 г.
