ՌԴ-ում COVID -19-ի պատվաստանյութը փորձարկելու համար ընտրվել է կամավորների երկու խումբ
Ռուսաստանի Պաշտպանության նախարարությունից հայտնում են, որ կորոնավիրուսի պատվաստանյութի կլինիկական փորձարկումների համար ընտրվել է կամավորների երկու խումբ:
«Առաջին խմբում ընտրվել են այն զինծառայողները (սպաները, հրամանատարները, պայմանագրային զինծառայողները), ովքեր ինքնակամ ցանկություն են հայտնել մասնակցել փորձարկումներին: Երկրորդ խմբում ընդգրկվել են կամավորներ քաղաքացիական անձանցից»,- հայտնում է գերատեսչությունը:
Բոլոր մասնակիցներին թույլատրվելու է մասնակցել փորձարկմանը միայն բուժզննումից հետո, պարզելու համար, թե արդյոք նրանց առողջությունը բավարարում է անհրաժեշտ պահանջներին:
Ներկայումս զինված ուժերից 50 կամավոր, այդ թվում՝ տասը բուժաշխատող, գտնվում են 14-օրյա մեկուսացման մեջ: Մասնակիցների քաղաքացիական խումբը կլինիկական փորձաքննության համար գտնվում է Բուրդենկոյի անվան գլխավոր ռազմական կլինիկական հիվանդանոցում:
Բոլոր կամավորները գտնվելու են հիվանդանոցի բժիշկների վերահսկողության տակ: Չափելու են նրանց արյան ճնշումը, զարկերակը, ջերմությունը, ուսումնասիրելու են մի շարք այլ հատուկ ցուցանիշներ:
Ավելի վաղ, ռազմական գերատեսչության 48-րդ կենտրոնական գիտահետազոտական ինստիտուտի ղեկավար Սերգեյ Բորիսևիչը հայտարարել էր, որ Գամալեայի և Պաշտպանության նախարարության համաճարակաբանության և մանրէաբանության ազգային հետազոտական կենտրոնը հաջողությամբ անցկացրել են կորոնավիրուսային պատվաստանյութի նախաքննական փորձարկումները, իսկ կլինիկական փուլը նախատեսվում է ավարտին հասցնել մինչև հուլիսի վերջ:
Մարտի սկզբին ԱՀԿ-ն հայտարարեց նոր կորոնավիրուսային պանդեմիկ վարակի բռնկման մասին: Համաձայն կազմակերպության վերջին տվյալների՝ ամբողջ աշխարհում վարակվածների ընդհանուր թիվը գերազանցել է յոթ միլիոնը: Մահացել է ավելի քան 400 հազար հիվանդ: