Իսրայելում մեծ սկանդալ է հասունանում
Իսրայելի պաշտպանության նախկին նախարար, «Մեր տունը Իսրայելն է» (ՄՏԻ) կուսակցության առաջնորդ Ավիգդոր Լիբերմանը, որը Հայաստանում «հայտնի է» որպես սիոնիստական ֆաշիստ․ համաձայնություն էր տվել իսրայելցիներին՝ մասնակցել Ադրբեջանի ռազմական գործողություններին 2016 թվականի ապրիլին, փետրվարի 23-ին հարցազրույց է տվել իսրայելական «Kanal 12» հեռուստաընկերությանը և անկեղծորեն բացահայտել է Իսրայելի վարչապետ Բենյամին Նեթանյահուին։ Լիբերմանի հայտարարությունները կարող են պայթեցնել Իսրայելը, ինչը նշանակում է նաև ամբողջ Մերձավոր Արևելքը: Արտասահմանյան փորձագետները հասկանում են, թե ինչու են հենց հիմա կատարվում բացահայտումներ: Չէ՞ որ մարտի 2-ին Իսրայելում կանցկացվեն արտահերթ խորհրդարանական ընտրություններ՝ արդեն երրորդ ընտրությունները մեկ տարուց պակաս ժամանակահատվածում: Քվեարկության օրվա մոտենալու հետ բոլոր առաջատար քաղաքական կուսակցությունները փորձում են հակառակորդներին հասցնել առավելագույն հնարավոր վնաս տեղեկատվաքարոզչական պատերազմի ճակատում: Վարչապետ Նեթանյահուն և նրա «Լիկուդ» իշխող կուսակցությունը թիրախ են ինչպես ձախակողմյան «Կախոլ-լավան» կուսակցության (գլխավորում է Իսրայելի զինված ուժերի գենշտաբի նախկին պետ Բենի Հանցը), այնպես էլ ազգային հայրենասիրական աջակողմյան ուժերի կողմից, որոնց ճամբարից է նաև Լիբերմանի ՄՏԻ կուսակցությունը:
Այն, ինչի մասին հայտնում ենք, իհարկե Իսրայելի ներքին խոհանոցի մանրամասներն են: Բայց չէ՞ որ առավելագույնս սրված է իրավիճակը Պաղեստինում և Պաղեստինի շուրջ: ԱՄՆ նախագահ Դոնալդ Թրամփի «դարի գործարքը», որին անմիջապես աջակցել է Նեթանյահուն, իրականում Մերձավոր Արևելքում իրավիճակն ավելի է սրել, ոչ թե հանգեցրել է խաղաղության: Բենի Հանցը նույնպես աջակցել է «դարի գործարքին». Թրամփը նրանց երկուսին էլ ընդունել է Վաշինգտոնում, և, ըստ երևույթին, Թրամփին երկար ժամանակ պետք չեկավ «համոզելու» իսրայելացիներին: Հետևաբար պետք է հասկանանք, թե ինչ կա Լիբերմանի բացահայտումների հետևում. իր բազմաթիվ քայլերը, երբ նա Իսրայելի կառավարության անդամ էր, ուղղված էին նաև հայերի դեմ՝ Իսրայելում, Սիրիայում կամ նույնիսկ Անդրկովկասում:
Այսպիսով, ըստ Լիբերմանի խոսքերի՝ Իսրայելի արտաքին հետախուզության ղեկավար Յոսի Քոենը և գեներալ Հերցի Ալևին երկու շաբաթ առաջ վարչապետ Նեթանյահուի ցուցումով գաղտնի ուղևորվել են Քաթար: «Նրանք գնացել և խնդրում էին Քաթարի կառավարությանը՝ մարտի 30-ից հետո գումար փոխանցել պաղեստինյան ՀԱՄԱՍ շարժմանը Գազայի հատվածում: Քաթարցիները հայտարարել են մարտի 30-ից հետո գումարի փոխանցումը դադարեցնելու մասին»,- ասել է Լիբերմանը: Գազայի հատվածը գտնվում է ՀԱՄԱՍ-ի վերահսկողության տակ, ուստի պաղեստինյան այս անկլավին գումար հատկացնելը, ըստ Լիբերմանի, հավասարազոր է «ահաբեկիչների» ֆինանսավորմանը: Քաթարն ավելի վաղ հայտարարել էր մարտից սկսած Գազայի հատվածի բնակիչներին ֆինանսական օգնության դադարեցման մասին: Դոհան ֆինանսական օգնություն է ցուցաբերել Գազայի գրեթե 75 000 աղքատ ընտանիքների և վերջին տարիներին եղել է անկլավի գլխավոր արաբական հովանավորը: Ընդհանուր առմամբ, թերակղզային էմիրությունը տարեկան պաղեստինցիներին հատկացնում էր 30 միլիոն դոլար: Իսկ Իսրայելում ՀԱՄԱՍ շարժումը պաշտոնապես ներառված է ահաբեկչական կազմակերպությունների ցուցակում… Այսինքն՝ հարվածելով Նեթանյահուին, Լիբերմանը փաստացի մեղադրում է Իսրայելի վարչապետին ՀԱՄԱՍ-ի հետ գաղտնի դավադրության մեջ: Այնուամենայնիվ, մեր կարծիքով, Լիբերմանի նպատակը երկկողմանի է. սա ոչ միայն Նեթանյահուին և «Լիկուդ» կուսակցությունը թուլացնելու փորձ է, այլև պաղեստինցիների միջև պառակտումն ուժեղացնելու: Չէ՞ որ հայտնի է, որ ՀԱՄԱՍ-ի և Պաղեստինի ազատագրման կազմակերպության (ՊԱԿ) միջև կան ուժեղ և լուրջ տարաձայնություններ, ՀԱՄԱՍ-ը պարբերաբար մեղադրում է ՄԱԿ-ին՝ Իսրայելի գաղտնի ծառայությունների հետ համագործակցելու համար: Ի պատասխան՝ ՊԱԿ-ը խոսում է այն մասին, որ ՀԱՄԱՍ-ն ստեղծվել է «Մոսադ» հետախուզական գործակալության կողմից՝ ՊԱԿ-ը թուլացնելու համար և այլն:
Հասկանալի է, որ առանց Քաթարի ֆինանսական աջակցության, Գազայում կարող են անկարգություններ սկսվել, ընդ որում՝ սոցիալ-տնտեսական հողի վրա: Իրավիճակը սպառնում է տարածվել նաև Պաղեստինի մյուս տարածքներում: Իսրայելը, իհարկե, կաթվածահար չի լինի, բայց ակնհայտորեն կկանգնի մեծ թվով խնդիրների առաջ: Բացի դրանից, Գազայում կթուլանա ՀԱՄԱՍ-ի իշխանությունը: Իսկ Լիբերմանը վաղուց է երազում ոչնչացնել այս շարժումը: Ստացվում է, որ Իսրայելի պաշտպանության նախկին նախարարը փորձում է «մեկ կրակոցով երկու նապաստակ սպանել», նախ՝ թույլ չտալ, որ «Լիքուդ» կուսակցությունն ու Նեթանյահուն հաղթեն խորհրդարանական ընտրություններում, կամ էլ մեծապես թուլացնել իրենց հնարավորությունները: Եվ երկրորդ. նպաստել Գազայի հատվածում ՀԱՄԱՍ-ի դիրքերի վատթարացմանը: Կարող են լինել այլ վարկածներ, բայց մենք բավարար տեղեկատվություն չունենք, որպեսզի դիտարկենք ՊԱԿ-ի հետաքրքրվածության հավանականությունը և դրա առաջնորդ Մահմուդ Աբասի շահագրգռվածությունը Նեթանյահուի և ՀԱՄԱՍ-ի անկման հարցում: Այնուամենայնիվ պարզ է, որ եթե Լիբերմանի բացահայտումներին ընթացք տրվի, ապա տարածաշրջանը կպայթի, ավելին, նորից պառակտում կառաջանա արաբական աշխարհում որպես ամբողջություն․ այլ երկրների արաբները և Իրանը, օրինակ, կարող են Քաթարին մեղադրել Իսրայելին օգնելու մեջ: Շարունակեք հետևել իրավիճակի զարգացմանը…
Սերգեյ Շաքարյանց
