«Դատական ոլորտում կատարվող բարեփոխումները պետք է կրեն ոչ թե կոսմետիկ, այլ խորքային բնույթ»․ Վասիլիս Մարագոս
Արդարադատության նախարարի տեղակալ Վիգեն Քոչարյանն այսօր ընդունել է Եվրոպական հանձնաժողովի հարևանության և ընդլայնման հարցերով գլխավոր տնօրինության Հայաստանի, Ադրբեջանի, Բելառուսի և Արևելյան գործընկերության հարցերով բաժնի ղեկավար Վասիլիս Մարագոսի գլխավորած պատվիրակությանը: ՀՀ արդարադատության նախարարության լրատվական ծառայության տեղեկացմամբ, հանդիպման ընթացքում կողմերը քննարկել են դատական բարեփոխումների շրջանակին, անցումային արդարադատությանը և Եվրոպական Միության կողմից Հայաստանի Հանրապետությանը տրամադրվող բյուջետային աջակցությանն առնչվող մի շարք հարցեր:
Վասիլիս Մարագոսը նշել է, որ ուրախ է նոր կառավարության ձևավորումից հետո կատարած այցի համար և հույս է հայտնել, որ նախկինում սկսված և նախանշվող բարեփոխումների ծրագրերը նոր թափով առաջ կընթանան:
Փոխնախարար Քոչարյանը շնորհակալություն է հայտնել գործընկերոջը դատաիրավական ոլորտում ԵՄ կողմից Հայաստանին տրամադրվող շարունակական աջակցության համար և ընդգծել, որ այդ առումով Եվրոպական Միությունը Հայաստանի գլխավոր գործընկերներից է:
Հանդիպման ընթացքում Վիգեն Քոչարյանը ներկայացրել է դատական բարեփոխումների շրջանակում նախատեսվող գործողությունների հաջորդականությունը և վստահություն է հայտնել, որ նախանշված բարեփոխումների ծրագրերն ակտիվ առաջ կմղվեն:
Վասիլիս Մարագոսը շնորհակալություն է հայտնել հանգամանալի ներկայացման համար և համաձայնել, որ դատական ոլորտում կատարվող բարեփոխումները պետք է կրեն ոչ թե կոսմետիկ, այլ խորքային բնույթ և այդ առնչությամբ հայտնել է ԵՄ աջակցության պատրաստակամությունը:
Հանդիպման ավարտին կողմերը սերտ համագործակցությունը շարունակելու պատրաստակամություն են հայտնել և համաձայնեցրել են հետագա գործողությունների ժամանակացույցը:
