Հայաստանը դե ֆակտո չի մասնակցում ՀԱՊԿ աշխատանքներին․ Պեսկով
Հայաստանը դե ֆակտո չի մասնակցում Հավաքական անվտանգության պայմանագրի կազմակերպության (ՀԱՊԿ) աշխատանքներին, իսկ կազմակերպությունում նրա հետագա կարգավիճակը կախված կլինի անդամ երկրների քննարկումներից։ Այս մասին ուրբաթ լրագրողների հետ զրույցում հայտարարել է ՌԴ նախագահի մամուլի քարտուղար Դմիտրի Պեսկովը։
«Դուք գիտեք, որ Երևանն այժմ դե ֆակտո չի մասնակցում ՀԱՊԿ աշխատանքներին։ Դուք լսել եք ՀԱՊԿ-ին մասնակցության նպատակահարմարության վերաբերյալ Երևանի պաշտոնական դիրքորոշումը։ Կանոնադրական փաստաթղթերում իսկապես նախատեսված են որոշակի քայլեր։ Իսկ հետագա ամեն ինչ կախված կլինի նրանից, թե ինչ բնույթի քննարկումներ տեղի կունենան կազմակերպության շրջանակում», – ասել է Պեսկովը՝ պատասխանելով Հայաստանի և ՀԱՊԿ-ի շուրջ ստեղծված իրավիճակի վերաբերյալ Կրեմլի դիրքորոշման մասին հարցին։
Ավելի վաղ ՀԱՊԿ գլխավոր քարտուղար Թաալաթբեկ Մասադիկովը հայտարարել էր, որ Հավաքական անվտանգության խորհրդում կարող է քննարկվել Հայաստանին ձայնի իրավունքից զրկելու և կազմակերպությունում քվոտային պաշտոններում Հայաստանի քաղաքացիների առաջադրումը կասեցնելու հարցը։
Հիշեցնենք, որ Հայաստանը 2024 թվականին հայտարարել է ՀԱՊԿ-ին իր մասնակցության սառեցման մասին։ Միաժամանակ, Երևանը դադարեցրել է կազմակերպության անդամավճարների վճարումը։
