ԱՄՆ-ն առաջին անգամ խոստովանել է, որ տիեզերքում զենք է տեղակայել

Միացյալ Նահանգներն առաջին անգամ խոստովանել է, որ հարձակողական զենք է տեղակայել Երկրի ուղեծրում։ Այս մասին հաղորդում է BBC-ի ռուսական ծառայությունը։

Օդային, տիեզերական և կիբեռպատերազմի համաժողովում ելույթ ունենալով՝ Ռազմաօդային ուժերի նախարար Թրոյ Մեյնքը հայտարարել է, որ այս զենքերն անհրաժեշտ են ամերիկյան ուժերը «զարգացող սպառնալիքներից» պաշտպանելու համար։ Նա չի մանրամասնել զենքի հնարավորությունները և չի նշել, թե երբ են դրանք ուղեծիր դուրս բերվել։

Մինչ օրս ամերիկացի պաշտոնյաները խոսել են միայն տիեզերքում ռազմական կարողություններն ամրապնդելու իրենց մտադրությունների մասին՝ մատնանշելով ռուսական և չինական ծրագրերը, որոնք «նպատակ ունեն ռազմական հակամարտության դեպքում հարձակվել ամերիկյան արբանյակների վրա և խափանել դրանց աշխատանքը»։

ԱՄՆ նախագահ Դոնալդ Թրամփի վարչակազմը նշել է, որ հրթիռներ և ԱՄՆ-ի տարածքին սպառնացող այլ թիրախներ որսալու համար նախատեսված «Ոսկե գմբեթ» համակարգը կներառի տիեզերական բաղադրիչ, այդ թվում՝ կալանիչ հրթիռներ։

1967 թվականին ԽՍՀՄ-ն և Միացյալ Նահանգները ստորագրել են տիեզերքում զանգվածային ոչնչացման զենքի տեղակայումն արգելող պայմանագիր։ Այնուամենայնիվ, այն չի վերաբերում սովորական զենքի տեսակներին, և վերջին տարիներին Ռուսաստանը, Չինաստանը և Միացյալ Նահանգները զարգացնում են տարբեր հնարավորություններ՝ հարվածելու հակառակորդի արբանյակներին, որոնք կարևոր են կապի, հետախուզության և նավիգացիայի համար:

Ըստ հրապարակման՝ տիեզերքի, այդ թվում՝ Լուսնի և այլ երկնային մարմինների ուսումնասիրության և օգտագործման գործում պետությունների գործունեությունը կարգավորող սկզբունքների մասին պայմանագիրը բաց է այլ երկրների ստորագրման համար:

2019 թվականին Միացյալ Նահանգները 70 տարվա ընթացքում առաջին անգամ ստեղծել է զինված ուժերի նոր ճյուղ՝ Տիեզերական ուժերը։ 2025 թվականին նախագահ Դոնալդ Թրամփը հրամանագիր է ստորագրել, որով Տիեզերական ուժերը կարող են իրականացնել ոչ միայն պաշտպանական, այլև հարձակողական առաքելություններ։

Տիեզերական ուժերի խոսնակը պարզաբանել է, որ այս նպատակների համար իրենք ունեն «կինետիկ և ոչ կինետիկ հնարավորություններ»։

2024 թվականին Միացյալ Նահանգները հայտնել է, որ Ռուսաստանը արձակել է արբանյակ, որը, հավանաբար, ունակ է հարձակվել այլ արբանյակների վրա։ Ռուսաստանը չի մեկնաբանել այս հայտարարությունը։

ԱՄՆ տիեզերական ուժերում նշում են, որ Չինաստանը «ռազմական արդիականացման ռազմավարության շրջանակներում մշակում և կիրառում է տիեզերական և հակատիեզերական կարողություններ», իսկ Ռուսաստանը «տիեզերքը դիտարկում է որպես ռազմական գործողությունների թատերաբեմ և տիեզերքում գերիշխանությունը համարում է վճռորոշ գործոն ապագա հակամարտություններում»։