Բաքուն հայտնում է, որ Օդեսայի ափերի մոտ անօդաչուի հարձակման է ենթարկվել Ադրբեջանի քաղաքացիներով նավ
Ադրբեջանի արտաքին գործերի նախարարությունը հայտնել է, որ Օդեսայի ափերի մոտ անօդաչու թռչող սարքի հարձակման է ենթարկվել թուրքական Okean Maritime ընկերությանը պատկանող Atlas Bey քաղաքացիական բեռնանավը։ Գերատեսչության տվյալներով՝ նավի վրա գտնվել է Ադրբեջանի 11 քաղաքացի։
«Առկա տեղեկությունների համաձայն՝ Ադրբեջանի քաղաքացի հանդիսացող նավապետից բացի, անձնակազմի մյուս անդամները տեղափոխվել են Օդեսայի ափ։ Նրանց առողջական վիճակը գնահատվում է բավարար։ Ներկայում միջոցներ են ձեռնարկվում նավապետին որոնելու ուղղությամբ»,- նշվում է Ադրբեջանի ԱԳՆ-ի հայտարարության մեջ։
Կառույցը նաև հայտնել է, որ Ուկրաինայում Ադրբեջանի դեսպանությունը մշտական կապի մեջ է համապատասխան մարմինների հետ և ձեռնարկում է անհրաժեշտ քայլեր՝ Ադրբեջանի քաղաքացիներին հյուպատոսական աջակցություն ցուցաբերելու համար։
