Բունդեսթագը մերժեց Կիևին ռազմական աջակցություն տրամադրելու վերաբերյալ առաջարկը
Գերմանիայի Բունդեսթագը չի աջակցել Ուկրաինային տրամադրվող աջակցությունը մեծացնելու կոչ անող բանաձևին, մասնավորապես՝ Կիևին Taurus և PAC-3 հրթիռներ մատակարարելուն։ Այս մասին հայտնում է Բունդեսթագի պաշտոնական էջը՝ ներկայացնելով բանաձևի քվեարկության արդյունքները։
Բանաձևին կողմ է քվեարկել ընդամենը 79 պատգամավոր, դեմ՝ 510-ը։ Առաջարկը մերժվել է ինչպես կառավարող կոալիցիայի, այնպես էլ ընդդիմադիր կուսակցությունների կողմից։
Օրենսդրական նախաձեռնությունը ներկայացրել է «Միություն 90/Կանաչներ» կուսակցությունը։ Փաստաթուղթը կոչ էր անում Ուկրաինային տրամադրել լրացուցիչ ռազմական և հումանիտար օգնություն։
Վկայակոչելով Ուկրաինայում քաղաքացիական թիրախների ուղղությամբ Ռուսաստանի իրականացրած զանգվածային օդային հարվածները՝ «Կանաչները» կառավարությանը կոչ է արել ընդլայնել Ուկրաինային ցուցաբերվող ֆինանսական, դիվանագիտական, հումանիտար և ռազմական աջակցությունը՝ հիմնվելով իրական կարիքների և Սահմանադրությունում նոր ընդգրկված այն հատուկ բացառության վրա, որը վերաբերում է միջազգային իրավունքի խախտմամբ հարձակման ենթարկված պետություններին։
Նշված կոնկրետ միջոցառումների թվում էին թիրախ դարձած էներգետիկ ենթակառուցվածքների վերանորոգումը, արդիականացումն ու ապակենտրոնացումը, ինչպես նաև աջակցությունը հիվանդանոցներին և բնակչության մատակարարման համար կենսական նշանակություն ունեցող տրանսպորտային ուղիներին։
Օրենսդիրների կարծիքով՝ անհրաժեշտ է նաև ընդլայնել Ուկրաինայի կարողությունները՝ ոչնչացնելու Ռուսաստանի տարածքի խորքում տեղակայված հրամանատարական կետերը, արձակման կայանքները, ռազմական օդանավակայանները, զինամթերքի և վառելիքի պահեստները, ինչպես նաև ռազմական արտադրության օբյեկտները։
