ԱՄՆ-ը Իրանի վրա ճնշման շրջանակում պատժամիջոցներ է սահմանել Իրաքի նավթի փոխնախարարի դեմ
Իրանի վրա տնտեսական ճնշումը մեծացնելու նպատակով ԱՄՆ ֆինանսների նախարարության՝ արտասահմանյան ակտիվների վերահսկողության վարչությունը պատժամիջոցների ենթարկված անձանց անվանացանկում ներառել է Իրաքի նավթի փոխնախարար Ալի Մաարիջ ալ-Բահադլիի անունը։ «Արմենպրես»-ի հաղորդմամբ՝ այս մասին նշված է ԱՄՆ ֆինանսների նախարարության տարածած հաղորդագրությունում։
«Պատժամիջոցներն առնչվում են այդ թվում ալ-Բահադլիին, որը չարաշահում է իր պաշտոնական դիրքը՝ նպաստելու նավթի զարտուղի վաճառքին, որպեսզի եկամուտ ապահովի իրանական ռեժիմի և Իրաքում նրա դաշնակից խմբավորումների համար»,- ասվում է նախարարության հաղորդագրությունում։
Ամերիկյան կողմի տեղեկություններով՝ ալ-Բահադլին տարիներ շարունակ նպաստել է իրանական նավթի անօրինական փոխադրող Սալիմ Ահմեդ Սաիդին, «Ասաիբ Ահլ ալ-Հաք» խմբավորման և Իրանի հարստացմանը։
Պատժամիջոցներն առնչվում են նաև երկու զինյալ խմբավորումների երեք բարձրաստիճան անդամների, ինչպես նաև իրաքյան չորս նավթային ընկերությունների։
ԱՄՆ ֆինանսների նախարարությունը վերահաստատել է Իրանի վրա առավելագույն ճնշում գործադրելու իր մտադրությունը, այդ թվում՝ նավթի առևտրում Իրանին աջակցող արտասահմանյան ընկերությունների նկատմամբ պատժամիջոցներ կիրառելու միջոցով:
