Ռուս մասնագետներն արդեն ոտքով անցել են այս ավելի քան 40 կմ հատվածը Հայաստանի հարավում․ Բաքվում ՌԴ դեսպանը Մեղրիով անցնող ճանապարհի մասին
«Զանգեզուրի միջանցքի» երկաթուղին կարող է վերականգնվել մոտավորապես երկու տարում։ Ռուս մասնագետներն արդեն ոտքով անցել են այս ավելի քան 40 կիլոմետրանոց հատվածը Հայաստանի հարավում։ «ՌԻԱ նովոստի»-ի հաղորդմամբ, այս մասին հայտարարել է Ադրբեջանում Ռուսաստանի դեսպան Միխայիլ Եվդոկիմովը։
«Այս ճանապարհի երկարությունը 44 կիլոմետր է։ Ռուս երկաթուղային շինարարության մասնագետներն այս երթուղին անցել են ոտքով։ Ճանապարհը կարող է վերականգնվել մոտավորապես երկու տարում, քանի որ թունելները չեն ավերվել և անհրաժեշտ է վերականգնել միայն երկաթուղային համալիրը», -ասել է Եվդոկիմովը ադրբեջանական լրատվամիջոցին։
Նրա խոսքով, թե ով և ինչպես կվերականգնի ճանապարհը, հիմնարար նշանակություն չունի։ «Այս ճանապարհը ոչ միայն կամրապնդի Ադրբեջանի և Հայաստանի միջև հարաբերությունները, այլև կստեղծի պայմաններ տարածաշրջանում տնտեսական կապերի զարգացման համար։ Գլխավորն այն է, որ ճանապարհի վերականգնումը հնարավորինս շուտ ավարտվի», -նշել է ռուս դիվանագետը։
2025 թվականի օգոստոսի 8-ին, Վաշինգտոնում Ադրբեջանի նախագահ Իլհամ Ալիևի և ՀՀ վարչապետ Նիկոլ Փաշինյանի և ԱՄՆ նախագահ Դոնալդ Թրամփի միջև կայացած հանդիպումից հետո, ընդունվեց հռչակագիր երկու երկրների միջև խաղաղության և միջպետական հարաբերությունների հաստատման մասին համաձայնագրի համաձայնեցված տեքստի նախաստորագրման վերաբերյալ։ Երևանը նաև համաձայնեց համագործակցել ԱՄՆ-ի և երրորդ կողմերի հետ՝ «Միջազգային խաղաղության և բարգավաճման Թրամփի երթուղին» ստեղծելու համար։
Ինչպես օգոստոսի 9-ին հայտարարեց Փաշինյանը, երթուղին ներառում է նավթի և գազի խողովակաշարեր, էլեկտրահաղորդման գծեր, ինտերնետային մալուխներ և երկաթուղի՝ Երևանի և Բաքվի միջև՝ Իրանին սահմանակից երկաթուղու երկայնքով։
