Դատարանը մեղավոր ճանաչեց Սամվել Վարդանյանին

Դատարանը մեղավոր ճանաչեց խուլիգանություն կատարելու և անհանդուրժողականություն հրահրելու մեջ մեղադրվող Սամվել Վարդանյանին։

Փաստաբան Ռուբեն Մելիքյանն ասաց․ «Եթե պաշտպանները միջնորդում են դատարանին արդարացնելու երկու մեղադրանքով էլ, մեկ մեղադրանքով է  արդարացվում, գոհ լինել չենք կարող։ Խուլիգանություն հոդվածով եղավ մեղադրական դատավճիռ, որը ոչ մեծ ծանրության արարք էր, նախատեսում է մինչև 2 տարվա ազատազրկում։ Միաժամանակ ՔՕ մեկ այլ հոդվածի համաձայն, առաջին անգամ ոչ մեծ ծանրության արարք կատարած անձին արգելվում է  նշանակել ազատազրկում։ Այսինքն, չի կարող Սամվել Վարդանյանի նկատմամբ  ազատազրկում նշանակվել։

Իսկ մյուս հոդվածով՝ ատելության խոսք, որը միայն ազատազրկում է նախատեսում 1-4 տարով, դատարանը կայացրեց արդարացման վճիռ։ Այս մասով գոհ ենք, մյուս մասով անպայման բողոքարկելու ենք»,- ասաց փաստաբանը։

Հիշեցնենք, որ Սամվել Վարդանյանը մեղադրվում է խուլիգանություն կատարելու ու անհանդուրժողականություն հրահրելու մեջ՝ ՔՊ-ական նախկին պատգամավոր Հակոբ Ասլանյանի հետ միջադեպի փաստով։