Եթե ՔՊ-ն Գյումրիում պարտվի, արտահերթ ընտրություններ են լինելու. Հովիկ Աղազարյան
«Ես կարծում եմ՝ ԱԺ-ն համաձայնություն կտա ինձ անձեռնմխելիությունից զրկելուն, որովհետև ՔՊ խմբակցության պատգամավորների ցանկում ընդամենը մի քանի հոգի են, որ իրավաբաններ են և կարող են այս կամ այս կամ այն կերպ ադեկվատ կամ ճշգրիտ գնահատել իրողությունները, իսկ մյուսները այդքան իրավաբանական գիտելիքներ չունեն, և հետևաբար պետք է հնարավորություն տան դատախազությանը և իրավապահ մյուս մարմիններին՝ սկսելու գործընթաց, պարզելու, թե ինչ է տեղի ունեցել»,-ԱԺ-ում լրագրողների հետ զրույցում նշեց ԱԺ պատգամավոր, ՔՊ-ից հեռացված Հովիկ Աղազարյանը:
Նա համոզմունք հայտնեց, որ դա քաղաքական որոշում է. «Պարոն Փաշինյանի նպատակը ինձ մանդատից զրկելն է, և դրա համար կա շատ գեղեցիկ, ռեալ ճանապարհ՝ Գյումրիի ընտրություններում ՔՊ-ն պարտություն է կրում և վարչապետը գնում է արտահերթ ընտրությունների: Հետևաբար բոլորը, այդ թվում նաև ես, զրկվում են մանդատից»:
Աղազարյանը վստահ է, որ եթե ՔՊ-ն Գյումրիում պարտվի, արտահերթ ընտրություններ են լինելու. «Չեմ ասի ինչ հիմքով, դա կասեմ երբ այդ բանը տեղի ունենա: Չեմ ուզում հուշեմ, որովհետև ես չեմ ուզում, որ լինեն արտահերթ ընտրություններ»:
