Ինչո՞ւ Մեծ Պահքի ընթացքում չեն համբուրում Ավետարանը

Շարունակվում է Մեծ պահքը, որը սկսվել է մարտի 3-ից։ Մեծ Պահքի շրջանը տևում է 48 օր` Բուն Բարեկենդանից մինչև Ս. Հարության (Զատկի) տոնի նախօրեն: Ս. Հարությանն տոնն այս տարի կնշվի ապրիլի 20-ին։

Մայր Աթոռի տեղեկատվական համակարգից պատասխանել են մի քանի հաճախ տրվող հարցերի՝ Մեծ Պահքի վերաբերյալ.
Հարց– Ո՞րն է պահքի հոգևոր խորհուրդը:
Պատասխան– Պահքն իմաստ ունի, եթե վերագտնում ենք մեր հոգևոր ուրախութունը, իսկ այդ ուրախությունը վերագտնելու համար կարևոր է Աստծու հետ կենդանի կապը, զղջումն ու ապաշխարությունը: Այս ճանապարհին պահեցողության կարևոր ուղեկիցը նաև աղոթքն է: Ս․ Գրքում ասված է. «Բարի են աղոթքները՝ պահեցողություններով» (Տոբիթ 12:8)։ Պահքը, սակայն, հետզհետե ավելի կիրառելի դարձավ իբրև ապաշխարության նշան և արտահայտություն: Սրա ամենաբացահայտ օրինակը գալիս է նինվեացիներից (Հովնան 3:5-9):  Պահքի ներկա ձևին, այսինքն՝ համադամ կերակուրներից և մսեղենից հրաժարվելու սովորությանը, առաջին անգամ հանդիպում ենք  Դանիելի մարգարեության գրքում, ուր ասված է. «Այդ օրերին ես՝ Դանիելս, երեք շաբաթ սուգի մեջ էի: Լավ հաց չկերա, միս և գինի չմտավ իմ բերանը, յուղով չօծվեցի, մինչև որ վերջացան երեք շաբաթները» (Դան. 10։2-3):

Հարց– Ինչո՞ւ Մեծ Պահքի ընթացքում չեն համբուրում Ավետարանը։
Պատասխան– Մեծ Պահքի շրջանում մինչև Սուրբ Հարության (Զատկի)  Եկեղեցում Ավետարանը չեն համբուրում ի նշան այն բանի, որ Ադամը զրկվեց Կենաց ծառի պտղի ճաշակումից:

Հարց– Մեծ Պահքի ընթացքում կարելի՞ է մատաղ անել։
Պատասխան– Ոչ, չի կարելի։

Հարց– Մեծ Պահքի շրջանում ե՞րբ է կարելի Ս. Հաղորդություն ստանալ:
Պատասխան– Պահքի ժամանակ Ս. Հաղորդություն չի տրվում, բացառությամբ այն դեպքերի, երբ բաց Խորանով Պատարագ է մատուցվում: