ԱՄՆ ՄԶԳ-ի պաշտոնյաներին արձակուրդ են ուղարկել, քանի որ նրանք հրաժարվել են DOGE-ին տվյալների հասանելիություն տրամադրել
ԱՄՆ Միջազգային զարգացման գործակալության (USAID) անվտանգության տնօրենին և նրա տեղակալին շաբաթ օրը վարչական արձակուրդ են ուղարկել այն բանից հետո, երբ նրանք փորձել են խանգարել Կառավարության արդյունավետության դեպարտամենտի (DOGE) աշխատակիցներին մուտք գործել գործակալության պաշտպանված համակարգեր, հաղորդում է NBC News-ը՝ հղում անելով տեղեկացված աղբյուրներին:
Նրանց խոսքով, DOGE թիմը փորձել է մուտք գործել ԱՄՆ ՄԶԳ անվտանգության համակարգեր և աշխատակիցների անձնական ֆայլերին:
DOGE-ի աշխատակիցներն ի վերջո կարողացել են մուտք գործել պաշտպանված համակարգեր, ասել են երեք աղբյուրներ:
Հեռուստաալիքը նաև հայտնել է, որ ԱՄՆ ՄԶԳ-ի ավելի քան 1000 աշխատակից և կապալառուներ արդեն կրճատվել են կամ ազատվել են մեկ շաբաթ առաջ նախագահ Դոնալդ Թրամփի վարչակազմի կողմից ԱՄՆ-ի համաշխարհային օգնության գրեթե ամբողջական սառեցման պատճառով:
Աշխատակազմի վերջին կրճատումների արդյունքում 125 հոգուց բաղկացած Օրենսդրական և Հասարակայնության հետ կապերի բյուրոյի աշխատակազմի մեծ մասը վարչական արձակուրդ է ուղարկվել շաբաթ օրը ուշ երեկոյան, իսկ գործակալության՝ հասարակայնության հետ կապերի հարցերով մի քանի աշխատակիցների համար արգելափակվել է մուտքը դեպի ներքին հաղորդակցության համակարգեր:
