Հայտնի է ադրբեջանական ինքնաթիռի կործանման պատճառը․ դեկտեմբերի 26-ին սուգ կհայտարարվի
Ղազախստանում աղետի ենթարկված ադրբեջանական ավիաուղիների ինքնաթիռում բալոնի պայթյուն է տեղի ունեցել: Այս մասին հաղորդում է «Կազինֆորմ» լրատվական գործակալությունը՝ վկայակոչելով Ղազախստանի Մանգիստաուի շրջանի Առողջապահության վարչությունը։
«Դեկտեմբերի 25-ին ժամը 10:58-ին ստացվել է 1-ին կատեգորիայի շտապ կանչ (ինքնաթիռում բալոն է պայթել): Ուղարկվել են «շտապ օգնության» 22 բրիգադ և Աղետների բժշկական կենտրոնի 6 բրիգադ»,- հայտնել է վարչության պետը:
Բալոնի պայթյունի վերաբերյալ այլ մանրամասներ չեն հաղորդվել։ Նաև նշվում է, որ դեպքի վայրում արձանագրվել է 4 զոհի մարմնի հայտնաբերումը։
Բաքվից Գրոզնի մեկնող ինքնաթիռն աղետի ազդանշան է տվել Կասպից ծովի վրայով թռչելիս, որից հետո այն փոխել է ուղղությունը և մեկնել Ղազախստան՝ հարկադիր վայրէջքի։
Ավելի վաղ հաղորդվում էր, որ ավիավթարի պատճառ է դարձել թռչունների երամի հետ բախումը։ Ինքնաթիռում գտնվել է 62 ուղևոր և անձնակազմի 5 անդամ։ Շուրջ 20 մարդ ողջ է մնացել։ Ադրբեջանի նախագահը, որն ԱՊՀ երկրների գագաթնաժողովին մասնակցելու համար գտնվում էր Ռուսաստանում, վերադարձել է Բաքու։
Ինքնաթիռի վթարի կապակցությամբ Ադրբեջանում դեկտեմբերի 26-ին սուգ կհայտարարվի։
Ինչպես հաղորդում է ԱՊԱ-ն, համապատասխան կարգադրությունը ստորագրել է Ադրբեջանի նախագահ Իլհամ Ալիևը։
