ԱԺ հանձնաժողովը հաստատեց Բաքվի հետ սահմանների սահմանազատման հանձնաժողովների կանոնակարգը
ԱԺ արտաքին հարաբերությունների խորհրդարանական հանձնաժողովը հաստատեց Ադրբեջանի հետ սահմանների սահմանազատման հանձնաժողովների աշխատանքի կանոնները և վավերացման ուղարկեց օրենսդիր մարմնի լիագումար նիստին, որը կսկսվի երեքշաբթի։
«Փաստաթղթի ընդունմանը կողմ քվեարկեց 5, դեմ՝ 3 պատգամավոր, որոշումն ընդունվեց»,- ասաց ԱԺ մշտական հանձնաժողովի նախագահ Սարգիս Խանդանյանը։ Ընդդիմությունը դեմ է քվեարկել այս փաստաթղթի ընդունմանը։
Այսօր՝ հոկտեմբերի 21-ին ԱԺ արտաքին հարաբերությունների մշտական հանձնաժողովում քննարկվեց Հայաստանի և Ադրբեջանի միջև պետական սահմանի սահմանազատման և սահմանային անվտանգության հարցերով հանձնաժողովի ու Ադրբեջանի և Հայաստանի միջև պետական սահմանի սահմանազատման պետական հանձնաժողովի համատեղ գործունեության մասին» կանոնակարգը վավերացնելու մասին հարցը: Հիմնական զեկուցողը Ադրբեջանի հետ սահմանների սահմանազատման հայկական հանձնաժողովի նախագահ, փոխվարչապետ Մհեր Գրիգորյանն էր։
Սեպտեմբերի 2-ին Հայաստանի կառավարությունը հրապարակեց Ադրբեջանի հետ սահմանների սահմանազատման հանձնաժողովների համատեղ աշխատանքի մասին դրույթների վավերացման նախագիծը։ Օրինագծի համաձայն՝ Հայաստանի և Ադրբեջանի հանձնաժողովները սահմանազատման գործընթացում կօգտագործեն բոլոր քարտեզները, ինչպես նաև իրավական հիմք ունեցող փաստաթղթերը։ Կանոնակարգերը կազմված են հայերեն, ադրբեջաներեն և ռուսերեն լեզուներով և պետք է վավերացվեն նաև Ադրբեջանի կողմից։
Հիշեցնենք, որ Կառավարությունը հավանություն է տվել այդ կանոնակարգին, իսկ ՍԴ-ն այն համարել է Սահմանադրությանը չհակասող՝ ընդգծելով, որ ՀՀ անկախության հռչակագիրը Սահմանադրության մաս չէ, թեև Սահմանադրությունում հղում կա Անկախության հռչակագրին:
