Վրաստանը հետ է կանչել Ուկրաինայում իր դեսպանին․ ի՞նչ կապ ունի Սաաակաշվիլին
Վրաստանը հետ է կանչել Ուկրաինայում իր դեսպանին՝ խորհրդատվությունների նպատակով՝ կապված նախկին նախագահ Միխեիլ Սաակաշվիլու նշանակման հետ: Լուրը հաստատել է Վրաստանի արտգործնախարար Դավիթ Զալկալիանին:
Միխեիլ Սաակաշվիլու՝ Ուկրաինայի բարեփոխումների խորհրդի գործադիր կոմիտեի ղեկավարի պաշտոնում նշանակվեու լուրը հաստատվել է նախօրեին՝ ի հեճուկս Վրաստանի իշխանությունների, այդ թվում վարչապետի հայտարարությունների, թե անընդունելի է Սաակաշվիլուն Ուկրաինայում որևէ բարձր պաշտոնում նշանակելը:
Վրաստանի արտգործնախարարն ասել էր, թե ռազմավարական գործընկերոջ կողմից Վրաստանի դատական համակարգի կողմից փնտրվող ու դատապարտված անձի նմանօրինակ նշանակումը հարցեր է առաջացնում: Սա էլ դարձել է պատճառ, որ Վրաստանը հետ կանչի դեսպան Թեյմուրազ Շարաշենիձեին՝ խորհրդատվությունների համար:
Ըստ Զալկալիանու՝ դա միջազգային պրակտիկայում ընդունված քայլ է, ներկա պահին դա ցույց է տալիս, որ երկու երկրների հարաբերություններում խնդիրներ են ծագել, սակայն այս փուլում դիվանագիտական հարաբերությունների խզման կամ ռազմավարական գործընկերության վերանայման մասին խոսք չկա: Դեսպանի հետ որոշվելու է հաջորդող գործողությունների ընթացքը, որպեսզի ստեղծված իրավիճակը բացասական չանդրադառնա երկկողմ հարաբերությունների վրա:
Ապրիլի վերջին հայտնի դարձավ, որ Սաակաշվիլուն Ուկրաինայի կառավարությունում պաշտոն է առաջարկվել: Վրաստանի իշխանությունների պատասխանը չուշացավ, նրանք սա որակեցին որպես ոչ գործընկերային քայլ ու վտանգ վրաց-ուկրաինական հարաբերություններում ու խոստացան համարժեք արձագանքել:
Սաակաշվիլին Վրաստանը ղեկավարել է 2004-2013 թթ., ապա ընտրություններում իր կուսակցության պարտությունից հետո նա լքեց երկիրը, 2015-ին Ուկրաինայի նախկին նախագահ Պորոշենկոն նրան նշանակեց Օդեսայի նահանգապետի պաշտոնում ու Ուկրաինայի քաղաքացիություն շնորհեց, ինչի հետ կապված՝ Սաակաշվիլին ավտոմատ կորցրեց Վրաստանի քաղաքացիությունը:
Ներկայումս Սաակաշվիլին հեռակա դատապարտված է բանտային 2 պատժի՝ ընդհանուր առմամբ 6 տարի, իսկ դատարանում նրա նկատմամբ ևս մի քանի գործեր են քննվում:
