Խորհրդարանում հյուրընկալվել է Ավստրիայի Ազգային խորհրդի մարդու իրավունքների հանձնաժողովի նախագահը
ԱԺ Հայաստան-Ավստրիա բարեկամական խմբի ղեկավար Շիրակ Թորոսյանը և բարեկամական խմբի անդամ, ԱԺ եվրոպական ինտեգրման հարցերի մշտական հանձնաժողովի նախագահ Արման Եղոյանը հունիսի 17-ին հանդիպել են Ավստրիայի Ազգային խորհրդի մարդու իրավունքների հանձնաժողովի նախագահ Նիկոլաուս Շերակի հետ:
Ողջունելով հյուրին՝ Շիրակ Թորոսյանը նշել է վերջին տարիներին հայ-ավստրիական հարաբերությունների նշանակալի առաջընթացը: «Մեզ համար շատ կարևոր է Ավստրիան՝ որպես Եվրամիության առանցքային երկիր: Հայ-ավստրիական հարաբերությունների խորացումը, այդ թվում՝ միջխորհրդարանական մակարդակով և բազմակողմ ձևաչափով, մեզ համար շատ կարևոր է»,- ընդգծել է բարեկամական խմբի ղեկավարը: Նա հավելել է, որ հայ-ավստրիական հարաբերություններն առաջընթաց են գրանցում նաև Հայաստանում գործող Ավստրիական զարգացման գործակալության գործունեության արդյունքում: Ընդգծվել է վերջին տարիներին երկու երկրների միջխորհրդարանական կապերի սերտացումը տարբեր ձևաչափերով:
Շիրակ Թորոսյանը Նիկոլաուս Շերակին ներկայացրել է Հայաստանի և Ադրբեջանի միջև ընթացող սահմանազատման գործընթացը, ՀՀ կառավարության «Խաղաղության խաչմերուկ» նախագիծը, կարևորել հայ-ադրբեջանական հարաբերությունների կարգավորման հարցում ապաշրջափակման գործընթացը, ճանապարհների բացման և նորմալ հաղորդակցությամբ առևտրատնտեսական հարաբերությունների զարգացումը: Այս համատեքստում բարեկամական խմբի ղեկավարը կարևորել է սահմանային կայունությունը, ինչում իր զգալի դերակատարությունն է ունեցել ԵՄ քաղաքացիական առաքելությունը: Նշվել է, որ առաքելության գործունեության ընթացքում էապես կայունացել է սահմանային իրավիճակը Հայաստանի և Ադրբեջանի միջև:
Հանդիպման ընթացքում հայ պատգամավորներն անդրադարձել են ԵՄ-ի հետ վիզաների ազատականացման հարցին, Հայաստանում Ավստրիայի դեսպանություն ունենալու կարևորությանը, տարածաշրջանային խնդիրներին:
Ավստրիայի Ազգային խորհրդի մարդու իրավունքների հանձնաժողովի նախագահ Նիկոլաուս Շերակը կարևորել է մեր երկրի հետ հարաբերությունների սերտացումը, անդրադարձել ԵՄ-ի հետ վիզաների ազատականացման գործընթացի դժվարություններին, ընդգծել ժողովրդավարության կարևորությունը:
«Մեզ համար շատ կարևոր է լավ հարաբերություններ ունենալ տարածաշրջանում, և մեզ համար լավագույն գործընկերը Հայաստանն է»,- մասնավորապես ասել է Նիկոլաուս Շերակը՝ անդրադառնալով տարածաշրջանային հարցերին:
Զրուցակիցներն անդրադարձել են նաև ընդհանուր հետաքրքրություն ներկայացնող այլ հարցերի:
