30 անձ ձերբակալվել է, այդ թվում Աշոտ Երկաթը, դասախոսներ, տարիքով մարդիկ, որոնք վնասվածքներ ունեն. փաստաբան
Հունիսի 12-ին Բաղրամյան-Դեմիրճյան փողոցների խաչմերուկում, «Տավուշը հանուն Հայրենիքի» շարժման կազմակերպած բողոքի զանգվածային ակցիայի ընթացքում ոստիկանության կողմից անհամաչափ ուժի կիրառման գործողության ընթացքում բերման ենթարկված 30 անձ ձերբակալվել է 72-ժամով։ Panorama.am-ին ասաց փաստաբան, «5 իրավապաշտպանների» նախաձեռնության անդամ Սերգեյ Հարությունյանը։
Նա ասաց, որ նրանք ձերբակալվել են զանգվածային անկարգությանը վերաբերող քրեական գործի շրջանակներում։
«Եթե 72 ժամի ընթացքում նրանց մեղադրանք չառաջադրվի, կալանքի միջնորդություն չներկայացվի, 60-72-ժամյա ռեժիմի ընթացքում ազատ կարձակվեն։ Եթե կալանքի միջնորդություններ լինեն, արդեն կախված կլինի դատարանից»,- մանրամասենց փաստաբանը։
Ս. Հարությունյանը ոստիկանության Էրեբունի և Կենտրոնի բաժիններում տեսակցել է 18 անձի։
«Նրանց թվում է «Սիսական» ջոկատի հրամանատար Աշոտ Մինասյանը՝ Աշոտ երկաթը, դասախոսներ, տարիքով մարդ, որն ունի առողջական խնդիր, ծեծված, վնասվածքներով մարդիկ, մեկն ուներ երիկամի ցավը, մյուսը վահանաձև գեղձի հատվածում հարված էր ստացել, խեղդվում էր։ Մի քանի անգամ շտապօգնություն է կանչվել»,- ասաց Ս.Հարությունյանը։
