Բագրատ Սրբազանի առաջնորդությամբ Շարժումը շարունակում է երթը դեպի Երևան․ օր 4
ՀՀ Կոտայքի մարզի Սոլակ գյուղի մատույցներից մայիսի 7-ին շարունակվում է «Տավուշը հանուն հայրենիքի» քաղաքացիական շարժման երթը դեպի Երևան, որը մայիսի 4-ին մեկնարկել է սահմանամերձ Կիրանցից՝ Հայ առաքելական եկեղեցու Տավուշի թեմի առաջնորդ Բագրատ արքեպիսկոպոս Գալստանյանի առաջնորդությամբ։
«Այս շարժումը ո՛չ իմ, ո՛չ որևէ այլ անձի մասին է, կուռք չստեղծեք,-երթի մասնակիցների հետ զրույցում ասել է Բագրատ Սրբազանը։- Կուռք սարքելու պատճառով ենք մենք այսօր հայտնվել փողոցում, դա պետք է մեր մտքից սրբվի մինչև վերջ։ Մենք գործիքներ ենք, ամեն մեկս մեր չափով:
Ոչ ոք պետք է ամբարտավանություն չունենա, հպարտություն չունենա, այն կեղծ խոսքը չունենա, թե՝ ես արեցի: Ոչ մի բան էլ դու չես արել: Էստեղ գտնվողներիդ եմ ասում՝ ոչ մի բան էլ դուք չեք արել: Եթե մենք միջոնց ու գործիք չլինենք, ոչ մի բան չի լինելու: Բայց դա մենք չենք անում, մեր մեջ եղածն է, որ Աստված արթնացնում է»,- ասել է նա:
Ակցիային միացել են ընդդիմադիր բազմաթիվ քաղաքական ուժեր, հասարակական գործիչներ, գիտության ու արվեստի գործիչներ։ Նրանք դեմ են Ադրբեջանի հետ պետական սահմանի սահմանազատման գործընթացի շրջանակներում Հայաստանի միակողմանի զիջումներին, ընդհանրապես իշխանությունների քաղաքականությանը։
Դեպի Երևան երթի այսօրվա առաջին գլխավոր կանգառը սպասվում է, որ կլինի Կոտայքի մարզի վարչական կենտրոն Հրազդան քաղաքը։
Արդեն մայիսի 8-ին ցուցարարները մտադիր են լինել Աբովյանում, որտեղ իրենց համախոհները կժամանեն նաև Հայաստանի երկրորդ քաղաքից՝ Գյումրիից։ Դեպի Երևան երթի մասնակիցները մտադիր են մինչև մայիսի 9-ի կեսօր հասնել Հայաստանի մայրաքաղաքի Հանրապետության հրապարակ և մանրամասն պահանջներ ներկայացնել իշխանություններին։
Հիշեցնենք, որ Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը պետք է ավարտվի մինչև 2024 թ. մայիսի 15-ը:
ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և իրենց տեղը կզիջեն սահմանապահ զորքերին:
Տավուշի սահմանամերձ գյուղերի բնակիչներն ապրիլի 19-ից բողոքի ակցիաներ են իրականացնում Հայաստան-Վրաստան միջպետական ճանապարհին: Նրանք դեմ են սահմանազատման այն տարբերակին, որը համաձայնեցրել են Երևանն ու Բաքուն։
Զուգահեռ իրականության մեջ Հայաստան-Ադրբեջան սահմանին արդեն շուրջ 40 սահմանային սյուն է տեղադրվել:
Կիրանց տանող ճանապարհը բացվել է մայիսի 3-ին։