Ադրբեջանի ԱԳՆ-ն ՆԱՏՕ-ի նախկին գլխավոր քարտուղարին «նեղմիտ քաղաքական գործիչ» է անվանել
Ադրբեջանի ԱԳՆ-ն հրապարակել է օրվա երկրորդ զայրացած հայտարարությունը։
Առավոտյան թողարկումը նվիրված էր ԵՄ-ի, ՆԱՏՕ-ի, ԱՄՆ-ի, Ֆրանսիայի, Հունաստանի և էլ ով գիտե ում դեմ դժգոհությանը։
Երեկոյան թողարկումը նվիրված է անձամբ ՆԱՏՕ-ի նախկին գլխավոր քարտուղար Անդերս Ֆոգ Ռասմուսենին և նրա խմբի հրապարակած զեկույցին։
Մեկնաբանելով ներկայացված զեկույցը՝ Ադրբեջանի ԱԳՆ մամուլի քարտուղար Այխան Հաջիզադեն, դեմքի արտահայտությունը փոխելով, դատապարտել է բուն զեկույցը և ՆԱՏՕ-ի նախկին գլխավոր քարտուղարին մեղադրել զրպարտության, փաստերի խեղաթյուրման, անհեթեթություն տարածելու և ընդհանրապես հայանպաստ քարոզչության մեջ։
«Ապրիլի 5-ին ԱՄՆ-ԵՄ-Հայաստան եռակողմ համաժողովի նախօրեին հանրությանը զեկույցի հրապարակումը հայկական լոբբիստական խմբի կողմից, որը գործում է Հայաստանի կառավարության հետ շահութաբեր գործարքի շրջանակներում՝ խթանելու հայանպաստ պատմությունները, բացահայտում է նշված զեկույցի և այն ստորագրած նախկին պաշտոնյաների իրական մտադրությունները»,- ասել է Ադրբեջանի ԱԳՆ ներկայացուցիչը։
Անցնելով հիստերիկ գրոհի՝ Հաջիզադեն հայտարարել է, որ «բաց աղբյուրներից ստացված ֆինանսական փաստաթղթերն ապացուցել, որ Անդերս Ռասմուսենը շարունակում է չարաշահել ՆԱՏՕ-ի նախկին գլխավոր քարտուղարի իր կարգավիճակը՝ իր լոբբիստական RasmussenGlobal ընկերություննը խթանելու և կասկածելի լոբբիստական և ազդեցության ծառայություններ մատուցելու համար, իսկ «Հայաստանի կառավարությունը, որպես իր հաճախորդ, հարյուր հազարավոր ԱՄՆ դոլար է ծախսել այս զեկույցի վրա, որը «հաստատվեց առանց շատ մտածելու»։
Վերջապես կորցնելով իրականության ողջ զգացումն ու արգելակները՝ ադրբեջանցի պաշտոնյան ասաց. «Որոշ նեղմիտ քաղաքական գործիչների, այդ թվում՝ եվրոպական կառույցների, ինչպիսիք են Եվրախորհրդարանը և Եվրախորհրդի խորհրդարանական վեհաժողովը, ծախսատար և անիմաստ զրպարտչական արշավներ իրականացնելը չի ծառայում տարածաշրջանային կայունության և խաղաղության հաստատման ջանքերին։ Փոխարենը, Հայաստանի կառավարությունը և հայկական լոբբիստական խմբերը պետք է կենտրոնանան տարածաշրջանում իրական խաղաղության օրակարգի խթանման վրա»:
