ԱՄՆ սենատորներն առաջարկում են արգելել ամերիկյան նավթի արտահանումը հակառակորդ երկրներ
Ամերիկացի սենատորներ դեմոկրատ Ջոն Ֆեթերմանը և հանրապետական Ջոնի Էռնստը երկկուսակցական օրինագիծ են ներկայացրել, որն արգելում է նավթի արտահանումը ԱՄՆ-ի հակառակորդ երկրներ: Այս մասին հղում անելով The Hill-ին՝ գրում է interfax.ru-ն:
Ինչպես պարզաբանում է հրատարակությունը, առաջարկվող օրինագիծը կարգելի ամերիկյան նավթային պաշարներից նավթի արտահանումը Չինաստան, Ռուսաստան, Իրան, Վենեսուելա, Սիրիա և Կուբա։
Բացի այդ, առաջարկվում է արգելել ԱՄՆ-ի ռազմավարական նավթային պահուստից նավթի վաճառքը «ցանկացած կազմակերպության, որը պատկանում, վերահսկվում կամ գտնվում է Չինաստանի Կոմունիստական կուսակցության ազդեցության ներքո»:
«Մեր ռազմավարական նավթային պահուստը նախատեսված է Ամերիկայի և մեր դաշնակիցների էներգետիկ անվտանգությունը պաշտպանելու համար: Մեր հակառակորդները չպետք է հնարավորություն ունենան նավթ գնել մեր ռազմավարական պահուստից. դա պարզապես խելամիտ քայլ է», – հայտարարել է Ֆեթերմանը:
