ՀՀ իշխանություններից ակնկալում ենք իրավական գնահատական․ ՌԴ դեսպանատունը՝ վանդալիզմի դեպքի մասին
Խորապես վրդովված ենք պաշարված Լենինգրադի երեխաների հուշակոթողի մոտ ցինիկ սադրանքից։ Դժվար է նման գործողությունները համարել այլ բան, քան բացահայտ անարգանքի արտահայտություն այս ողբերգության զոհերի և քաղաքը պաշտպանած հերոսների հիշատակի նկատմամբ։ Այս մասին հայտարարություն է տարածել Հայաստանում ՌԴ դեսպանատունը։
«Տեսանյութի հեղինակը ոտնահարել է ոչ թե Լենինգրադի ֆաշիստական շրջափակումից լիակատար ազատագրման 80-ամյակի կապակցությամբ հուշահամալիրում դրված ծաղկեպսակները, այլ երախտագիտության և հարգանքի տուրքը հայ ժողովրդի այն լավագույն հատկանիշներին, որը նրանք խորհրդանշում են։
Անհնար է հասկանալ անբարոյականության աստիճանը նրանց, ովքեր հրապարակային արհամարհում են ոչ միայն ողբերգական այդ իրադարձությունների ու նրանց զոհերի, այլև սեփական նախնիների հիշատակի նկատմամբ։
Ըստ հետազոտողների՝ Լենինգրադի բազմազգ պաշտպանների շարքերում կռվել են ավելի քան 100 հազար հայեր, որոնցից 4 հազարը եղել են կամավորները, իսկ տասը արժանացել են Խորհրդային Միության հերոսի կոչման։
Ուրախ ենք, որ մեր գնահատականը կիսում է հայ հասարակությունը, ինչի մասին է վկայում սոցցանցերում այս աղաղակող արարքի վերաբերյալ զանգվածային վրդովմունքը։
Դեսպանատունը հույս է հայտնում, որ այս գործողությունները կստանան համապատասխան իրավական գնահատական Հայաստանի իշխանությունների կողմից, և այս սադրանքի մասնակիցները պատասխանատվության կենթարկվեն»,-ասված է հաղորդագրության մեջ։
