Հանրային ծառայողների համար շենքային համալիր է կառուցվում. հաստատվել է 1-ին և 2-րդ փուլերի բնակարանների վաճառքի կարգը
Կառավարությունն իր այսօրվա՝ հոկտեմբերի 19-ի նիստում հաստատել է Հանրային ծառայողներին բնակարաններով ապահովման ծրագրի շրջանակներում Երևան քաղաքի Առնո Բաբաջանյան փողոցի N 42/5 հասցեում կառուցվող բազմաբնակարան շենքային համալիրի առաջին և երկրորդ փուլերի բնակարանների և ավտոկայանատեղիների վաճառքի կարգը:
Ըստ հիմնավորման՝ հաշվի առնելով բնակարանային շինարարության խթանման մասով պետության հանձնառությունը, ինչպես նաև եկամտային հարկի վերադարձման արտոնության պարագայում բնակչության բավական լայն շրջանակի կողմից առաջնային շուկայից բնակարան ձեռք բերելու հետաքրքրության աճման միտումներն, ինչպես նաև հանրային ծառայողների շրջանակում կատարված հարցումները և ստացած լայն արձագանքը՝ ծրագիրը դիտարկվել է նպատակահարմար և իրագործելի:
Ծրագրի առաջին փուլի շրջանակում նախատեսվում է բաշխվել թվով 700 բնակարան և թվով 490 ավտոկայանատեղի, իսկ երկրորդ փուլի շրջանակներում՝ թվով 300 բնակարան և թվով 210 ավտոկայանատեղի:
Հետևաբար, ամբողջ ծրագրի շրջանակներում բաշխվելու է թվով 1000 բնակարան և թվով 700 ավտոկայանատեղի:
