Արցախից բռնի տեղահանված 302 քաղաքացիներ դեռ հիվանդանոցներում են․ 11-ի վիճակը ծայրահեղ ծանր է
Հայաստանի տարբեր բժշկական հաստատություններում շարունակում է բուժում ստանալ Լեռնային Ղարաբաղից բռնի տեղահանված 302 քաղաքացի։ Հումանիտար կենտրոնում տեղի ունեցած ասուլիսում ասաց Նիկոլ Փաշինյանի մամուլի խոսնակ Նազելի Բաղդասարյանը։
Նրա խոսքով՝ 113-ի վիճակը շարունակում է մնալ ծանր, 11-ինը՝ ծայրահեղ ծանր։
«Վերակենդանացման բաժանմունքներում գտնվում է 5 երեխա, ևս 8 երեխա բուժվում է սովորական պայմաններում»,- ընդգծեց նա։
Նազելի Բաղդասարյանը նշեց նաև, որ արդեն 13 646 անձ դիմել է առաջնային առողջապահական բուժհաստատություններ։
Խոսնակը նաև հայտնեց, որ Արցախից բռնի տեղահանված բուժաշխատողներից 261-ն արդեն գրանցվել են Առողջապահության ազգային ինստիտուտում։