Իսրայելը հարվածներ է հասցրել Հալեպի օդանավակայանին
Սիրիայի հյուսիսում գտնվող Հալեպի միջազգային օդանավակայանը դադարեցրել է աշխատանքը Իսրայելի օդային հարձակումից հետո: Այս մասին նշվում է Սիրիայի Պաշտպանության նախարարության հայտարարության մեջ, որը փոխանցել է «Ալ Իխբարիա» հեռուստաալիքը:
«Ժամը 04:30-ի սահմաններում Իսրայելը Միջերկրական ծովի կողմից՝ Լաթաքիայի արևմուտքից օդային ագրեսիա է իրականացրել Հալեպի միջազգային օդանավակայանի ուղղությամբ, ինչը հանգեցրել է թռիչքուղու ոչնչացմանը և օդանավակայանի շարքից դուրս գալուն», — ասվում է հաղորդագրության մեջ։
Նշվում է, որ այս տարվա սկզբից ի վեր սա արդեն Իսրայելի 22-րդ հարվածն է սիրիական տարածքին:
Իսրայելական բանակը պարբերաբար օդային հարվածներ է հասցնում Սիրիայում տարբեր օբյեկտների վրա։ Մասնավորապես հրթիռակոծության են ենթարկվել Դամասկոսը, Հալեպը, Տարտուս նավահանգիստը և Մասյաֆ քաղաքի հետազոտական կենտրոնը։ Ինչպես նշել է ՄԱԿ-ում Ռուսաստանի մշտական ներկայացուցչի առաջին տեղակալ Դմիտրի Պոլյանսկին, իսրայելական հարձակումների պատճառով սիրիական իշխանությունները բազմիցս դիմել են կազմակերպության գլխավոր քարտուղարին, սակայն Անտոնիո Գուտերեշի կողմից արձագանք չի եղել։ Մոսկվան դա անընդունելի է համարում։
