Երրորդ համաշխարհայինը, նաև ըստ Հռոմի պապի, արդեն սկսված է, ասվածին հավելենք՝ գնալով մեծանում է միջուկային պատերազմի վտանգը. 22
Սկիզբը` այստեղ
Աշխարհը մտել է արմատական փոփոխությունների՝ «սահմանների տեղաշարժման» ժամանակաշրջան, արդյունքը կանխատեսելն այժմ գործնականում անհնար է, ռիսկերը մեծ են, ընդհուպ մինչև մարդկության ոչնչացում, սա, РБК-ի տեղեկացմամբ, Սանկտ Պետերբուրգի միջազգային տնտեսական համաժողովում «Հորիզոն-2040» նստաշրջանի մասնակիցների կարծիքն է:
ՆԱՏՕ-ի գագաթնաժողովի նախօրեին իրավիճակը գլորվում է Մոսկվայի հետ ռազմական դաշինքի դիմակայության ամենաանբարենպաստ սցենարին. Այս մասին լրագրողներին երեկ հայտարարել է Վաշինգտոնում Ռուսաստանի դեսպան Անատոլի Անտոնովը:
«Իրավիճակը շարունակում է գլորվել դեպի ամենաանբարենպաստ ելքը Ռուսաստանի Դաշնության և դաշինքի պետությունների դիմակայությունում»,- «РИА Новости»-ի տեղեկացմամբ , ասել է դեսպանը։
Նրա խոսքով՝ Արևմուտքի միջոցներն ավելի և ավելի անհաղթահարելի խոչընդոտներ են ստեղծում ռազմաքաղաքական ամենասուր ճգնաժամից դուրս գալու ճանապարհին, ինչը հղի է միջազգային անվտանգության համար ամենալուրջ հետևանքներով:
Լիտվայի մայրաքաղաք Վիլնյուսում երեկ սկսված և այսօր շարունակվող ՆԱՏՕ-ի գագաթնաժողովում, որին մասնակցում են ՆԱՏՕ- ի անդամ բոլոր երկրների ղեկավարները, նրանց թվում նաև՝ ԱՄՆ նախագահ Ջո Բայդենը, ի թիվս այլ որոշումների և հարցերի, հաստատել են Ռուսաստանի սահմանների մոտ ռազմական ներկայության ավելացման նոր ծրագրեր, քննարկել Մոսկվայի հետ հակամարտության դեպքում ստորաբաժանումների մարտունակության բարձրացումը: Գագաթնաժողովին ներկա է նաև Ուկրաինայի նախագահ Վլադիմիր Զելենսկին։
Նույն օրը՝ հուլիսի 11- ին, Վիլնյուսում ՆԱՏՕ-ի գագաթնաժողովի մեկնարկից առաջ, Ֆրանսիայի նախագահ Էմանուել Մակրոնը, «РИА Новости»-ի տեղեկացմամբ, հայտարարել է, որ Ֆրանսիան հեռավոր գործողության շառավղով հրթիռներ կփոխանցի Ուկրաինային: Իրականում առաջին հրթիռներն արդեն փոխանցվել էին կամ փոխանցվում էին Ֆրանսիայի նախագահի հայտարարությանը զուգահեռ:
«Ես որոշում եմ կայացրել ավելացնել սպառազինության և սարքավորումների մատակարարումն Ուկրաինային, թույլ տալ, որ դրանք խորը հարվածներ հասցնեն,- ասել է Մակրոնը։- Մենք որոշում ենք կայացրել նոր հրթիռների մատակարարման մասին, որոնք թույլ են տալիս խորը հարվածներ հասցնել»:
Խոսքը ֆրանսիական «Scalp» հեռահար հրթիռների մասին է, որոնց առաջին խմբաքանակն արդեն մատակարարել է Ուկրաինային: Ըստ նախնական տեղեկությունների, նախատեսվում է 50 հրթիռ փոխանցել, ինչը, սակայն, չի բացառում հետագայում դրանց քանակի ավելացումը:
«SCALP-EG – Scalp» հրթիռը ֆրանսիական տարբերակն է բրիտանական «Storm Shadow» թևավոր հրթիռի, որն արդեն ունի և օգտագործում է ուկրաինական բանակը: Մեծ Բրիտանիան մայիսից Ուկրաինայի զինված ուժերին է փոխանցել «Storm Shadow» թևավոր հրթիռներ՝ խոցման՝ մինչև 500 կիլոմետրից մինչև 250 կմ- ի կրճատված շառավղով: Հրապարակված տեղեկատվության համաձայն՝ Ուկրաինային տրվելու էր 600 (200 +400) «Storm Shadow» հրթիռ: «Scalp»- ն ունի ժամում ավելի քան 1000 կմ արագություն և կարող է թիրախներ խոցել մինչև 500 կմ հեռավորության վրա: Առավել կարևորն այն է, թե դրանք խոցման կրճատված շառավղո՞վ են տրվելու, ինչպես «Storm Shadow»- ը, թե…
«Դեռ պետք է հստակեցվի, թե խոցման ինչ շառավղի մասին է խոսքը»,- «Коммерсантъ»-ի փոխանցմամբ , ասել է ՌԴ նախագահի մամուլի քարտուղար Դմիտրի Պեսկովը:
Գերմանիայի պաշտպանության նախարարությունը, իր հերթին, երեկ, «РИА Новости»-ի տեղեկացմամբ հայտարարել է, որ ռազմական օգնության նոր փաթեթի շրջանակներում Կիևին կտրամադրի «Patriot» զռնիթահրթիռային համալիրի երկու կայանք, 40 հատ «Marder» հետևակի մարտական մեքենա և 25 հատ «Leopard 1 A5» 25 տանկ, վերանորոգման- տարհանման 5 զրահամեքենա, 20 000 միավոր հրետանային զինամթերք, 5000 միավոր 155 մմ տրամաչափի ծխասփյուռ արկ, ականազերծման միջոցներ: Ի թիվս այլ բաների, Բեռլինը ռազմական հատկացման փաթեթում ներառել է անօդաչու թռչող սարքերի դեմ պայքարի միջոցների համալիր, ինչպես նաև գերմանական «Luna» ԱԹՍ-ի հիման վրա մերձավոր հետախուզության միջոցների համալիր:
«РИА Новости»-ի փոխանցմամբ Սպիտակ տանն առընթեր Ազգային անվտանգության խորհրդի Եվրոպայի հարցերով ավագ տնօրեն Ամանդա Սլոուտը հայտնել է, որ այսօր ՆԱՏՕ-ի գագաթնաժողովում «Մեծ յոթնյակի» երկրների ղեկավարները կհայտարարեն Ուկրաինայի անվտանգության ապահովման երկարաժամկետ պարտավորությունների մասին:
Ըստ «Sky News» հեռուստաալիքի տվյալների, փաստաթուղթը նախատեսում է Կիևին ռազմական տեխնիկայի հատկացում, հետախուզական տվյալների փոխանակման ուժեղացում, Ուկրաինայի զինված ուժերի զինծառայողների ուսուցման ծրագրերի ընդլայնում, ինչպես նաև ռազմարդյունաբերական հզորությունների զարգացում:
«Ուկրաինային անվտանգության ինչ երաշխիքներ տրամադրելով, այդ երկրները փաստացի անտեսում են անվտանգության անբաժանելիության միջազգային սկզբունքը,- այսօր անդրադառնալով վերոնշյալին, լրագրողներին ասել է ՌԴ նախագահի մամուլի քարտուղար Դմիտրի Պեսկովը:- Այսինքն՝ Ուկրաինային անվտանգության երաշխիքներ տրամադրելով, նրանք ոտնձգություն են կատարում Ռուսաստանի Դաշնության անվտանգության դեմ»:
Պեսկովի խոսքով՝ դա հղի է «շատ և շատ բացասական հետևանքներով» պլանավորման ցանկացած հորիզոնում՝ միջնաժամկետ, երկարաժամկետ և նույնիսկ կարճաժամկետ հեռանկարում:
«Մեծ յոթնյակ» կոչվածը, ավելի բնութագրական է, G7-ն այսօր, «РИА Новости»-ի տեղեկացմամբ հրապարակել Է Ուկրաինայի վերաբերյալ համատեղ հռչակագիրը:
«Մենք հաստատում ենք, որ Ուկրաինայի անվտանգությունը եվրատլանտյան տարածաշրջանի անվտանգության անբաժանելի մասն է»,- նշված է փաստաթղթում։
Հռչակագրի հիմնական կետերից են՝ G7-ի երկրները կաջակցեն Ուկրաինային այնքան ժամանակ, որքան անհրաժեշտ կլինի, ռուսական ակտիվները սառեցված կմնան մինչև Կիևին «փոխհատուցում» վճարելը, «Մեծ յոթնյակն» Ուկրաինայի համար հեռահար զենքը համարում է մատակարարումների առաջնահերթություններից մեկը։
G7-ի պարտավորությունները նախատեսում են կայուն ուժերի ապահովում Ուկրաինայի պաշտպանության համար և ապագայում Ռուսաստանի հնարավոր «ագրեսիայի» զսպում։ Փաստաթղթում նշվում է նաև, որ մյուս երկրները ցանկացած պահի կարող են միանալ «Մեծ յոթնյակի» հռչակագրին:
Արթուր Հովհաննիսյան
