Վրաստանն ու Ադրբեջանը քննարկել են երկու երկրների միջև պետական սահմանի սահմանազատման և սահմանագծման հարցերը
Երկուշաբթի Վրաստանի փոխարտգործնախարար Լաշա Դարսալիայի և նրա ադրբեջանցի գործընկեր Խալաֆ Խալաֆովի հանդիպման ժամանակ քննարկվել են Վրաստանի և Ադրբեջանի միջև համագործակցությունը և Հարավային Կովկասի տարածաշրջանում իրադարձությունները, հայտնում է Agenda.ge-ն։
Երկու պետությունների միջև քաղաքական խորհրդակցությունների շրջանակում անցկացված հանդիպման ընթացքում քննարկվել է երկու երկրների միջև առկա «սերտ» համագործակցությունը, որը, ըստ կողմերի, «հաջողությամբ զարգանում է ինչպես երկկողմ, այնպես էլ բազմակողմ ձևաչափերում»,- նշվում է Վրաստանի ԱԳՆ-ի հաղորդագրության մեջ։
Պաշտոնական անձինք պատրաստակամություն են հայտնել «հետագայում» խորացնել երկկողմ համագործակցությունը տնտեսության, առևտրի, մշակույթի և այլ ոլորտներում։
Զրույցը նվիրված է եղել նաև տարածաշրջանում տիրող իրավիճակին, մարտահրավերներին և խաղաղ լուծումներին։
Կողմերը նշել են խաղաղության և կայունության կարևորությունը, ինչպես նաև Վրաստանի և Ադրբեջանի հատուկ ներդրումն ու համագործակցությունը տարածաշրջանի կայուն զարգացման գործում։
Հանդիպմանը քննարկվել են նաև երկու երկրների միջև պետական սահմանի սահմանազատման և սահմանագծման հարցերը, ինչպես նաև այս հարցով պետական հանձնաժողովների հերթական նիստի անցկացման հնարավորությունը։