Երրորդ համաշխարհայինը, նաև ըստ Հռոմի պապի, արդեն սկսված է, ասվածին հավելենք՝ գնալով մեծանում է միջուկային պատերազմի վտանգը. 19
Սկիզբը` այստեղ
Ռուսաստանի արտաքին հետախուզության ծառայությունը (ԱՀԾ) հիմնավոր կասկածներ ունի, որ Կիևի շարունակում է զանգվածային ոչնչացման զենքի տարատեսակներից մեկի՝ «կեղտոտ միջուկային ռումբի» ստեղծման աշխատանքները: Խոսքը ռադիոլոգիական զենքի մասին է, որի գործողությունը հիմնված է մեծ ճառագայթակտիվություն ունեցող ռադիոակտիվ նյութերի օգտագործման ու տարածման վրա՝ հակառակորդի հսկայական տարածքի, շրջակա միջավայրի ճառագայթային (ռադիոակտիվ) աղտոտման նպատակով:
Ըստ Ռուսաստանի Դաշնության արտաքին հետախուզության ծառայության (ԱՀԾ) մամուլի բյուրոյի այսօրվա հաղորդագրության , ԱՀԾ տնօրեն Ս. Ե. Նարիշկինը հայտարարել է, որ վերջերս տեղեկություններ են հայտնվել՝ վկայող Կիևի կողմից «կեղտոտ միջուկային ռումբի» ստեղծման աշխատանքների հնարավոր շարունակման մասին: Ճակատում անհաջողություններով անկյուն մղված Կիևի վարչակարգի միայն այս մտադրություններով կարելի է բացատրել Ռովնոյի ԱԷԿ-ից մեծ քանակությամբ բարձր ճառագայթաակտիվություն ունեցող նյութեր պարունակող ճառագայթված վառելիքի խմբաքանակ վերամշակման ուղարկելու Ուկրաինայի միջուկային կարգավորման պետական տեսչության որոշման մասին Ռուսաստանի ԱՀԾ ստացած տվյալները:
«Նման աշխատանքների մասին Կիևը նույնիսկ չի տեղեկացրել Ատոմային Էներգիայի միջազգային գործակալությանը (ՄԱԳԱՏԷ)՝ խախտելով նրա հետ երաշխիքների մասին համաձայնագիրը»,- ասել է Նարիշկինը:
Բնականաբար, հարց է առաջանում՝ ինչո՞ւ… Ինչպես պարզաբանել է Նարիշկինը, վերոնշյալ վառելիքը, որը Չեռնոբիլում գտնվող աշխատած միջուկային վառելիքի կենտրոնացված պահեստարանի հարթակ պաշտոնապես ուղարկվել է թաղման, պահպանման համար, իրականում, ըստ ՌԴ արտաքին հետախուզության ծառայության տվյալների, ուղարկվել է վերամշակման։
Այստեղ հարկ է նկատի ունենալ, որ աշխատած (ԱԷԿ- ում օգտագործված) միջուկային վառելիքը վերամշակելուց հետո հնարավոր չէ ատոմակայանում նորից օգտագործել էլեկտրաէներգիա ստանալու համար, նշված վառելիքից մեծ ճառագայթակտիվություն ունեցող իզոտոպների կորզմամբ այն պիտանի է դառնում «կեղտոտ ռումբի» ստեղծման համար:
ԱՀԾ տնօրենը հույս է հայտնել, որ ՄԱԳԱՏԷ-ն և և պրոֆիլային կառույցները ուշադրություն կդարձնեն Կիևի նման գործողություններին և կուժեղացնեն «ներխուժող» վերահսկողությունը միջուկային ոլորտում Կիևի ռեժիմի ցանկացած գործունեության նկատմամբ, հատկապես Ռովնոյի ԱԷԿ-ում և Չեռնոբիլի մեկուսացման գոտում: Ելնելով նրանից, որ Ուկրաինայի զինված ուժերի կողմից «կեղտոտ միջուկային ռումբի» հնարավոր կիրառումը ծանրագույն հետևանքներ կունենա Արևելյան Եվրոպայի, ներառյալ՝ Եվրամիության և Մերձսևծովյան պետությունների ողջ բնակչության կյանքի ու առողջության, ինչպես նաև էկոհամակարգի համար։
Հոկտեմբերի 23-ին «ՌԻԱ Նովոստի»- ն, վկայակոչելով տարբեր երկրների աղբյուրներ, հայտնել էր, որ Կիևը Ուկրաինայում «կեղտոտ միջուկային ռումբի» կամ փոքր հզորությամբ միջուկային զինամթերքի պայթեցմամբ սադրանք է նախապատրաստում՝ ՌԴ-ին զանգվածային ոչնչացման զենքի կիրառման մեջ մեղադրելու և աշխարհում հզոր հակառուսական արշավ սկսելու նպատակով:
Ռուսաստանի պաշտպանության նախարարությունից ավելի ուշ հաստատել են այդ տեղեկությունը։ ՊՆ- ում նշել են, որ պատրաստության են բերել ուժերն ու միջոցները նման սադրանքի դեպքում, որի նպատակը Ռուսաստանին մեղադրելն ու Ուկրաինայում հակամարտության հերթական սրումն առաջացնելն է: Նոյեմբերին ՄԱԳԱՏԷ-ի գլխավոր տնօրեն Ռաֆայել Գրոսին հայտնել էր, որ գործակալության աշխատակիցները Ուկրաինայի տարածքում «կեղտոտ ռումբի» վրա աշխատելու նշաններ չեն գտել: Հետաքրքիր է՝ ինչ է ասելու Գրոսին հիմա, ԱՀԾ վերոնշյալ հաղորդագրությունից հետո…
Հարկ է նկատել, որ Կիևի վարչակարգի կողմից «կեղտոտ միջուկային ռումբի» հնարավոր ստեղծումը միայն Ուկրաինայի տարածքում սադրանքի նպատակ չի կարող ունենալ: Այն կարող է ունենալ նաև ՌԴ տարածքում սադրանքի կամ Ռուսաստանի տարածքին նշված զենքով խոցելով, նրան մեծ, շատ մեծ վնաս պատճառելու նպատակ:
Ռուսաստանին զանգվածային բնաջնջման վերոնշյալ զինատեսակով Ուկրաինայի հարվածի դեպքում ՌԴ-ն, իր միջուկային դոկտրինին ու միջազգային իրավունքին լիովին համապատասխան, կարող է Ուկրաինայի զինված ուժերի նկատմամբ կիրառել մարտավարական միջուկային զենք: Հարկ է նաև նկատի ունենալ, որ ամերիկյան F-16 կործանիչները, որոնք Արևմուտքը մտադիր է շուտով փոխանցել Ուկրաինային՝ Ռուսաստանի դեմ կիրառելու համար, կարող են սարքավորվել միջուկային զենք, բնականաբար, նաև «կեղտոտ միջուկային ռումբ» կրելու համար:
Ռուսաստանը ռազմատեխնիկական պատասխան կտա Ուկրաինայի երկնքում F-16 կործանիչների հայտնվելու դեպքում. այս մասին RT-ին տված հարցազրույցում հայտարարել է ՌԴ արտգործնախարար Սերգեյ Լավրովը։
«Այժմ խոսվում է F-16 ինքնաթիռների մասին, որոնք իսկապես կարող են սարքավորվել միջուկային սպառազինություն կրելու համար։ F-16- ը ռազմատեխնիկական արտադրանք է, ուստի, իհարկե, եթե մենք տեսնենք, որ այդ ինքնաթիռները թռել են Ուկրաինայի վրայով և սպառնալիք են ստեղծում մեզ համար, իհարկե, կլինի նաև ռազմատեխնիկական պատասխան»,- ասել է Լավրովը։
Շարունակելի
Արթուր Հովհաննիսյան
