Արարատի մարզում գերեզմանատնից և ամառանոցներից գողություններ են եղել. կա ձերբակալված
Գերեզմանատնից և ամառանոցներից գողություններ են եղել։ Այս մասին հայտնել է ՀՀ ներքին գործերի նախարարության ոստիկանությունը։
«Գողությունների վերաբերյալ օպերատիվ տեղեկությունն Արտաշատի քրեական հետախույզներն իրացրին ապրիլի 25-ին: Ըստ տեղեկության` Արարատի մարզի Ոստան գյուղի 23-ամյա մի բնակիչ ընկերոջ հետ գողություններ է արել գյուղի գերեզմանատնից և Վերին Արտաշատ տանող ճանապարհի ամառանոցներից: Իրավապահներին հաջողվեց նաև պարզել, որ ընկերը Բաղրամյան գյուղից է, 20 տարեկան:
Ապրիլի 25-ի առավոտյան ոստանցի երիտասարդը ձերբակալվեց և տեղափոխվեց ոստիկանության Արտաշատի բաժին: Բացատրական աշխատանքի արդյունքում նա խոստովանեց կատարածներն ու պատմեց մանրամասներ: Մասնավորապես, անցած ամիսների ընթացքում երիտասարդները մի առանձնատան բաց դռնով մտել ու գողացել էին սառնարան, ձայնարկիչ ու կենցաղային իրեր: Պարզվել է նաև, որ նրանք երկու անգամ գողացել են գերեզմանոցի ցանկապատի խողովակներ և ալյումինե դետալներ:
Տուժած քաղաքացիներից ընդունվել են հաղորդումներ, գողոնը մասամբ հայտնաբերվել է:
Կազմված փաստաթղթերն ուղարկվել են Արարատի մարզային քննչական վարչություն: Նախաձեռնվել է քրեական վարույթ: Ձեռնարկվում են միջոցառումներ՝ բաղրամյանցի 20-ամյա երիտասարդին հայտնաբերելու, նաև այլ հանգամանքներ պարզելու ուղղությամբ»,- ասված է տարածված հաղորդագրության մեջ:
