Ադրբեջանը մեծ գին է վճարելու, եթե փորձի զենքով կամ այլ ճանապարհով ստիպել Արցախը ներառել իր կազմում․ Ռուբեն Վարդանյան
Արցախյան հարցի լուծման միակ տարբերակն Ադրբեջանի հետ շփման բանաձև գտնելն է՝ միայն որպես հարևանների, այլ ճանապարհ լինել չի կարող։ Այս մասին այսօր՝ մարտի 11-ին, «Ապագա Հայկակականը» համաժողովի ժամանակ հայտարարեց Արցախի նախկին պետնախարար, Նախաձեռնության համահիմնադիր Ռուբեն Վարդանյանը։
«Մենք մեզ չենք տեսնում Ադրբեջանի կազմում, և չեմ էլ հասկանում ինտեգրացիա բառը, որովհետև դրա մեջ իմաստ կա, որ ինչ-որ ժամանակ մենք եղել ենք իրենց մասը ու նորից պետք է հետ բերեն։ Այն ժամանակ լիովին ուրիշ ժամանակ էր՝ այսօրվանի հետ կապ չունեցող։ Միակ ճանապարհը պայքարելն է, ինչպես օրինակ Կուբան պայքարեց ԱՄՆ-ի դեմ։ Մենք 35 տարի պայքարել ենք և պետք է պատրաստ լինենք ևս այդքան պայքարելու։ Մենք անկախ պետություն ենք, չենք ենթարկվելու Ադրբեջանի պահանջներին։ Ադրբեջանը մեծ գին է վճարելու, եթե փորձի զենքով կամ այլ ճանապարհով ստիպել Արցախը ներառել իր կազմում»,- ասաց Վարդանյանը։
Ռուբեն Վարդանյանի խոսքով՝ չնայած բոլոր դժվարություններին՝ Արցախում կյանքը նույն տեմպով շարունակվում է։ Մարդիկ, անկախ ամեն ինչից, փորձում են պահպանել ոգին, չպարտվելու զգացողությունը։
«Արցախցիները շատ դիմացկուն են։ 1990-ական թվականներին, երբ շատ ավելի վատ պայմաններ էին, միևնույն է, երեխաները դպրոց էին գնում վերարկուներով և ցուրտ սենյակներում սովորում էին։ Դեպի գիտելիք ու ուսում պահանջն Արցախում այսօր էլ շատ ուժեղ է։ Այս օրերը ցույց տվեցին, որ Արցախի խնդիրը ոչ միայն արցախցիներին է, այլև ամբողջ հայությանը, և անգամ այն մարդկանց, որոնք հայ չեն, սակայն մեզ աջակցում են։ Արցախի մարտահրավերը բոլորինս է, և պետք չէ ասել՝ արցախցի, լիբանանցի, երևանցի, որովհետև այժմ բոլորս ենք արցախցի»,- ընդգծեց Ռուբեն Վարդանյանը։
