Հուսով ենք՝ դատական ծառայողները բարձր պատասխանատվությամբ կշարունակեն իրենց աշխատանքը. Դատական դեպարտամենտի հայտարարությունը

Վարչական դատարանի աշխատակիցների գործադուլը պայմանավորված է աշխատավարձերի բարձրացման պահանջով:

Այս մասին հայտարարություն է տարածել Դատական դեպարտամենտը՝ անդրադառնալով ՀՀ վարչական դատարանում աշխատավարձի բարձրացման պահանջով գործադուլին:

«Դատական իշխանությունը, դեռևս 2023 թվականից, տարբեր մակարդակներում, տարբեր միջոցներով բազմիցս բարձրացրել է այս ցավոտ խնդիրը։ Դատական դեպարտամենտը և Դատական իշխանության մյուս մարմիններն իրենց լիազորությունների շրջանակում բոլոր հնարավոր գործողությունները կատարել են, և հարցը գտնվում է պետական պատշաճ մարմինների ուշադրության կենտրոնում։

Հուսով ենք՝ դատական ծառայողները բարձր պատասխանատվությամբ կշարունակեն իրենց աշխատանքը` կարևորելով արդարադատության շահը, իսկ անձնական հանգամանքներով պայմանավորված անհնարինության դեպքում՝ իրենց ծառայությունը կիրականացնեն ավելի բարձր վարձատրվող ոլորտներում, մինչև աշխատավարձերի խնդրի համակարգային լուծումը»,- նշված է Դատական դեպարտամենտի հայտարարության մեջ:

Ավելի վաղ հայտնի էր դարձել, ՀՀ Վարչական դատարանում գործադուլ է` օգնականները, գործավարները ու քարտուղարներ իրավացիորեն հրաժարվում են աշխատել այն չնչին աշխատավարձով, որը իրենց համար է սահմանված` ամենօրյա տքնաջան աշխատանքի դիմաց։