Վերակառուցման և զարգացման միջազգային բանկը 26,5 մլն եվրոյի չափով վարկ կտրամադրի Հայաստանին. ՊԵԿ
Հայաստանին 26,5 մլն եվրոյի չափով վարկ կտրամադրվի։ Այս մասին սեպտեմբերի 12-ին ԱԺ նիստին Հայաստանի Հանրապետության և Վերակառուցման և զարգացման միջազգային բանկի միջև ստորագրված վարկային համաձայնագրի վավերացման հարցի քննարկման ժամանակ ասաց ՀՀ Պետական եկամուտների կոմիտեի նախագահի տեղակալ Աշոտ Մուրադյանը։
Միջոցները, նրա խոսքով, կտրամադրվեն Հայաստանի Հանրապետության և Վերակառուցման և զարգացման միջազգային բանկի միջև ստորագրված վարկային համաձայնագրի շրջանակներում։ Դրանք կօգտագործվեն հանրային հատվածի արդիականացման չորրորդ ծրագրի իրականացման համար։
«Այս վարկային համաձայնագրի շրջանակներում նախատեսվում է թվայնացնել որոշ պետական կառույցների կողմից մատուցվող ծառայությունները։ Խոսքը, մասնավորապես, արդարադատության նախարարության, ոստիկանության, ՊԵԿ-ի, ՏԻՄ-երի մասին է։ Թվայնացմանը զուգընթաց վերոնշյալ ծառայություններից օգտվողների համար նախատեսվում է նաև համապատասխան բջջային հավելվածներ ստեղծել»,- պարզաբանեց Մուրադյանը։
Նա նաև հայտնեց, որ ՎԶՄԲ վարկը Հայաստանին կտրամադրվի 25 տարի մարման ժամկետով, որից 14,5-ը՝ արտոնյալ։
