Որևէ մեկը պատկերացնո՞ւմ է Ադրբեջանի հետ խաղաղ գոյակցություն. Արման Թաթոյան
Ադրբեջանում գոյություն ունեն էթնիկ հիմքով և դրդապատճառներով պայմանավորված հանցագործություններ հայերի նկատմամբ և սպանություններ հենց առաջին հերթին: Դա հաստատել է Մարդու իրավունքների եվրոպական դատարանը իր մի շարք վճիռներով: Հայատյացությունը գեներացվում է բարձրաստիճան քաղաքական ուժերի կողմից՝ նախագահի գլխավորությամբ: Այսօր մամուլի ասուլիսում ասաց ՄԻՊ Արման Թաթոյանը:
«Այս պայմաններում դուք պատկերացնո՞ւմ եք խաղաղ գոյակցություն, բա ընթացիկ հոգեկան տառապանքնե՞րը, և նրանք արհեստական ձևով ձգձգում են գերիների հարցը և սա նույնպես հոգեկան բռնության ձև է, տեսեք՝ ինչքան է այս հարցը ազդում հայկական ներքին կարգավիճակի վրա, այս պայմաններում խաղաղ գոյակցություն հնարավոր չէ, նրանք նվաստացնում են մեր արժանապատվությունը ամեն օր»,- ասաց Արման Թաթոյանը:
Մարդու իրավունքների պաշտպանը նաև նշեց՝ հայատյացությունը կարևոր ցուցիչ է այն մասին, խաղաղ գոյակցությունն անհնար է, ադրբեջանական կողմը էթնիկ հիմքով մարդասպանություն է կատարում:
«Ես հատուկ հաղորդում եմ պատրաստել և միջազգային կառույցներին պետք է ներկայացնենք ՝ մարդու իրավունքների պաշտպանի գործառույթներն իրականացնելու համար հնչում են սպառնալիքներ և արշավ։ Մենք ուսումնասիրել ենք կոնֆլիկտային իրավիճակներ, և տարիներով սահմանային հարցերը չեն կարողանում լուծել, քար ու թուփ քննարկվում է, և մենք պետք է կարողանանք պատասխանել մի հարցի՝ մենք արդյո՞ք ունեցանք սահմանային կյանքի խաթարում, ոչ, չունեցանք»,- ասաց մարդու իրավունքների պաշտպանը:
Արման Թաթոյանը նաև անդրադարձավ գերիների հարցին՝ նշելով, որ այն, ինչ անում է ադրբեջանական կողմը, ապօրինի է, դրանք եռակողմ հայտարարությանը հակասող գործողություններ են:
«Մեր գերիներն Ադրբեջանում պահվում են ապօրինաբար: Միջազգային իրավունքի և մարդասիրական իրավունքի կոպիտ խախտում է գերի պահելը՝ ամսաթվով պայմանավորված, քանի որ մենք գործ ունենք ընթացիկ զինված կոնֆլիկտի հետ, և այդ կոնֆլիկտը դեռ չի դադարել։ Եթե կա զինված ընթացիկ հակամարտություն, ապա մենք գործ ունենք գերիների հետ: Այն, ինչ անում է Ադրբեջանը, հակասում է եռակողմ հայտարարությանը»,- ասաց Թաթոյանը:
