Գորիս-Կապան ճանապարհահատվածն անցել է Բաքվի հսկողության տակ՝ ստորագրված փաստաթղթի հիման վրա․ Գեղամ Մանուկյան
Մի քանի հարցում է ուղարկվել Հայաստանի կառավարություն, ԱԱԾ, ՊՆ, Գլխավոր շտաբ և այլ պետական կառույցներ։ «Հայաստան» խմբակցությունը ցանկանում էր պարզել, թե ինչ փաստաթղթերի հիման վրա են տեղի ունեցել նախորդ տարի Սյունիքի մարզում տեղի ունեցած գործընթացները։ Այս մասին դեկտեմբերի 20-ին ԱԺ-ում լրագրողների հետ զրույցում ասաց «Հայաստան» խմբակցության պատգամավոր Աննա Գրիգորյանը։
Պատգամավորը, մասնավորապես, նշեց, որ հարցումներ են ուղարկել և՛ ինքը, և՛ իր գործընկեր Գեղամ Մանուկյանը։ «Հիշեցնեմ, որ երբ ադրբեջանական զորքերն իրենց GPS սարքերով մոտեցան Սյունիքի մարզի հայկական գյուղերին, ՀՀ վարչապետ Նիկոլ Փաշինյանն ասաց, որ ադրբեջանցիները ինչ-որ բանավոր պայմանավորվածությունների հիման վրա են առաջ շարժվել։ Եվ մինչ օրս մենք հստակ պատասխան չունենք, թե իրականում ինչ է տեղի ունեցել»,-ասաց պատգամավորը։
Ընդդիմադիրները տեսագրությունների միջոցով ցույց տվեցին, թե ինչպես են իշխանության ներկայացուցիչներին մեկ տարվա ընթացքում տարբեր հարցեր տալիս, և ինչպես են նրանք ամեն կերպ խուսափում կոնկրետ պատասխաններից։
«Վերջերս ինձ համար միանգամայն անսպասելիորեն պատասխան ստացա գլխավոր շտաբի պետից։ Քանի որ պատասխանը գտնվում էր ԱԺ գաղտնի բաժնում, ես իրավունք չունեմ հրապարակել ամբողջական պատասխանը։ Սակայն պարզ է մի բան․ ՀՀ ԶՈՒ գլխավոր շտաբի պետ, գեներալ Արտակ Դավթյանի ստորագրած նամակը վկայում է, որ 2020 թվականի դեկտեմբերին Սյունիքում տեղակայված ՀՀ ԶՈՒ ստորաբաժանումները և կամավորական ջոկատները հետ են քաշվել մոտ 20 կմ։ Գորիս-Կապան ճանապարհի 21 կիլոմետրանոց ճանապարհահատվածը Ադրբեջանի վերահսկողության տակ է անցել ավելի վաղ ստորագրված փաստաթղթի հիման վրա»,-իր հերթին պարզաբանեց Գեղամ Մանուկյանը։
