Վիեննայում սկսվել է փորձագիտական խմբերի աշխատանքը Իրանի դեմ պատժամիջոցները չեղարկելու նպատակով
Գործողությունների համատեղ համապարփակ ծրագրի երկրների մասնակիցները նախօրեին պայմանավորվել են վերագործարկել պատժամիջոցների և միջուկային հարցերի շուրջ երկու փորձագիտական աշխատանքային խմբերը։ Գրում է IRNA-ն:
Երկուշաբթի օրը Իրանը և միջուկային համաձայնագրին մասնակից երկրները Վիեննայում բանակցություններ են սկսել համաձայնագրի վերականգնման շուրջ։
ԵՄ գլխավոր բանակցող Էնրիկե Մորան ասել է, որ պատժամիջոցների աշխատանքային խումբը, որը ձևավորվել է ապրիլին կայացած բանակցությունների նախնական փուլում, կվերսկսի իր աշխատանքները երեքշաբթի օրվանից, իսկ միջուկային էներգետիկայի աշխատանքային խումբը՝ մեկ օր անց։ Հանդիպումից հետո Մորան նշել է, որ «դրական է վերաբերվում այն ամենին, ինչ այսօր տեսել է»։
Իրանի արտաքին գործերի նախարարության խոսնակ Սաիդ Խաթիբզադեն երեքշաբթի օրը հայտարարել է, որ Իրանի բանակցային թիմը Վիեննայում է՝ պատժամիջոցները չեղարկելու նպատակով։
«Այն, ինչ տեղի է ունենում Վիեննայում, կենտրոնանում է պատժամիջոցների չեղարկման վրա: Մենք դրանից պակաս ոչինչ չենք ընդունում և ոչ մի ավելի պարտավորություն չենք ստանձնում, քան նշված է միջուկային գործարքում», – նշել է նա երեքշաբթի օրը:
