ԵԱՀԿ ՄԽ-ի առաքելությունը հիմնված է պայմանավորվածությունների և առաջարկությունների վրա, ոչ թե` պարտադրանքի
ԵԱՀԿ Մինսկի խումբը երբեք խաղաղություն պարտադրելու մանդատ չի ունեցել: Այս մասին հոկտեմբերի 4-ին մամուլի ասուլիսի ժամանակ ասաց ՀՀ երկրորդ նախագահ Ռոբերտ Քոչարյանը:
«Նրանց առաքելությունը հիմնված է պայմանավորվածությունների և առաջարկությունների վրա, այլ ոչ թե` պարտադրանքի: Եվ այսօր էլ նման մանդատ չկա»,- հիշեցրեց նախկին նախագահը:
Նրա խոսքով` ակնհայտ է, որ նույն ՄԽ-ում զգալիորեն աճել է Ռուսաստանի Դաշնության դերը: Բայց նաև ակնհայտ է, որ Ադրբեջանը բոլորովին այլ դիրքերում է: Ակնհայտ է նաև, որ Ադրբեջանի և Թուրքիայի դերը զգալիորեն աճել է:
«Այս ամենը պետք է հավասարակշռել: Հիմա շատ դժվար է ասել, թե ինչի է հնարավոր հասնել: Շատ բան կախված է տարածաշրջանային և գլոբալ զարգացումներից: Պրոֆեսիոնալ բանակցող կողմ է պետք, համոզմունք, որ հնարավոր է ինչ-որ բան փոխել և որպեսզի Հայաստանը, իր բոլոր հնարավորություններով, մտնի գործընթացի մեջ և պատասխանատվություն ստանձնի: Այս հանգամանքներից ոչ մեկը հիմա գոյություն չունի: Եթե այսպես անել, ոչ մի երաշխիք չկա, որ կստացվի: Բայց եթե չանենք, երաշխիք կա, որ կպարտվենք: Փորձել, թե՞ ոչ: Իհարկե` փորձել, այլ ոչ թե լվանալ ձեռքերը և խնդիրը դնել Ռուսաստանի ուսերին: Այս պատերազմից հետո Ռուսաստանը տարածաշրջանում ավելի շատ հաշվի կնստի Ադրբեջանի աճող դերի հետ` կնեղանանք մենք, թե ոչ: Իրականությունը սա է»,- ասաց նախկին նախագահը:
