Հայաստանի շուրջ պատերազմներ են ընթանում …
Հայաստանի շուրջը տեղի են ունենում բազմազան իրադարձություններ, որոնք ունեն շատ լուրջ պատճառներ և հետևանքներ: Օրինակ, ԱՄՆ-ի և Իսրայելի ճնշման տակ, չորս արաբական երկրներ՝ Սաուդյան Արաբիան, Արաբական Միացյալ Էմիրությունները, Եգիպտոսը և Բահրեյնը կոչ արեցին ստուգել Իրանի բոլոր միջուկային օբյեկտները: Իբր, Իրանը «սպառնում է» տարածաշրջանի անվտանգությանը: Իրանական Mehr News-ը սեպտեմբերի 10 -ին հայտնել է, որ Իրանի ԱԳՆ խոսնակ Սեյեդ Սաիդ Խաթիբզոդան արձագանքել է արաբական քառյակին՝ դատապարտելով Սաուդյան Արաբիայի, ԱՄԷ-ի, Բահրեյնի և Եգիպտոսի մեղադրանքները և ասել, որ այդ մեղադրանքները վկայում են արաբական աշխարհի կողմից Իրանի ընկալման ու ըմբռնման բացակայության մասին: Նա մերժեց այլ պետությունների ներքին գործերին Իրանի միջամտության մեղադրանքները և ակնարկեց, որ Սաուդյան Արաբիան է զբաղվում այլ երկրների ներքին գործերին միջամտելով և պատերազմներ հրահրելով Եմենում, Արևմտյան Ասիայում և Հյուսիսային Աֆրիկայում: Խաթիբզոդան չորս երկրներին խորհուրդ է տվել Իրանին մեղադրելու փոխարեն ուշադրություն դարձնել պաղեստինցիների դեմ կատարած Իսրայելի հանցագործություններին: Նա նաև նշել է, որ միջուկային և պաշտպանության ոլորտներում զարգացումն ու ձեռքբերումները Թեհրանի առաջնահերթություններից են:
Հասկանալի է, որ Իրանի դեմ այս երկրների գործողությունը ԱՄՆ-ի և Իսրայելի կողմից «արաբական ռազմական բլոկ» ստեղծելու ջանքերի արտացոլումն է. մի դաշինք, որը ուղղված է Պարսից ծոցում և Հնդկական օվկիանոսում Իրանին «զսպելուն»: Բայց պարոն Խաթիբզոդայի պատասխանը հուշում է, որ Իրանը մեղադրանքներ է պատրաստում արաբական այս երկրների դեմ… Այո, ճիշտ է` Պաղեստինի արաբ ժողովրդի դավաճանության և սիոնիստների հետ դավադրության մեջ մտնելու մասին: Դժվար է ասել, թե ինչ արձագանք կարող է ունենալ մահմեդական աշխարհում, երբ Թեհրանը սկսի իր գործնական քայլերն այս ուղղությամբ:
Այս ֆոնին Թուրքիան նոր ռազմական գործողություն սկսեց Սիրիայի քրդերի դեմ, ավելին՝ հարձակումները այն քրդերի դեմ էին, որոնք «Սիրիայի դեմոկրատական ուժերի» (SDF) ամերիկամետ բլոկի մաս են կազմում: Այս անգամ, թուրքերի մոտ ինչ-որ բան, ըստ երևույթին, «սխալ է գնացել»: Արդյունքում Սիրիայի քրդերը հակահարձակման անցան թուրքերի դեմ, սեպտեմբերի 10-ին հաղորդեց քրդական «Rudaw» լրատվական գործակալությունը: Էլ-Բաբ քաղաքի, որը ցանկանում էին գրավել թուրքերը, SDF դաշինքի հետ կապված ռազմական խորհուրդը ասաց, որ քրդերը հարձակվել են թուրքերի և թուրքամետ «սիրիական ընդդիմության» ուժերի վրա Ալ-Յաշլի գյուղում, որը գտնվում է Էլ-Բաբի մոտակայքում: Նրանց տվյալներով՝ սպանվել է 12 թուրք զինվոր, ևս 11-ը վիրավորվել են: Նաև, նրանց տեղեկություններով, սպանվել է 10 «սիրիացի ընդդիմադիր», ևս 10-ը վիրավորվել են: Ավերվել է երեք զրահամեքենա, երեք հորատման մեքենա, ոչնչացվել է ծանր զենք և ռազմական տեխնիկա, մեծ թվով շենքեր և ամրություններ: Ավելացնենք. Թուրքիայի պաշտպանության նախարարությունը հայտնել է միայն մեկ զոհվածի մասին՝ հետևակի սերժանտ Մուամեր Յիգիթ: Մարդու իրավունքների մոնիտորինգի սիրիական կենտրոնը հայտնել է մեկ թուրք զինծառայողի զոհվելու և 4 վիրավորի մասին: Բայց, ինչպես տեսնում ենք, Էլ-Բաբի քրդերը հերքում են Թուրքիայի պաշտպանության նախարարության և Մարդու իրավունքների սիրիական մոնիտորինգի կենտրոնի լավատեսական տվյալները: Այնուամենայնիվ, աշխարհը վաղուց գիտի, որ թուրքերն ու քրդերը հաճախ իրենց հաջողությունների կամ կորուստների մասին կեղծ տվյալներ են փոխանցում: Սակայն եթե այս անգամ Էլ-Բաբի քրդերը իրավացի են, նշանակում է, որ թուրքերը ընկել են մեծ ծուղակի մեջ. ի վերջո, ընդհանուր առմամբ սպանվել է 22 և վիրավորվել 21 թուրք կամ թուրքամետ «ընդդիմադիր»…
Եվ վերջապես, իրավիճակը Աֆղանստանում, որից վերջերս փախան ՆԱՏՕ-ի բոլոր զորքերը՝ ԱՄՆ-ի գլխավորությամբ: Մի քանի օր առաջ «Թալիբան» շարժման առաջնորդները հայտարարեցին Փանջշերի կիրճը գրավելու և երկրում պատերազմի ավարտի մասին: Սակայն սեպտեմբերի 10-ին «Afganistan Times» թերթը հայտնեց, որ բադախշանցի տաջիկները հակագրոհներ են ձեռնարկել թալիբների դեմ և արմատականներից հետ են գրավել այս ռեգիոնի երեք շրջանները: Նրա աղբյուրների համաձայն, աշխարհազորայինները վերահսկողություն են հաստատել Փանջշերի հյուսիսային և հյուսիսարևելյան հատվածներում գտնվող Դարա, Աբշար և Փարյան շրջանների վրա: Ինչպես նշվում է, դաժան մարտերի արդյունքում տաջիկները՝ լեգենդար Ահմադ Շահ Մասուդի հետևորդները, համախմբված Ազգային դիմադրության ճակատում, «ոչնչացրել են տասնյակ թալիբների»: Այսպիսով, պատերազմը չի ավարտվել, և այն, ինչ տեղի կունենա Աֆղանստանում հետագայում, ենթադրում ենք, մեծապես պայմանավորված կլինի նրանով, թե ինչ են ձեռնարկելու Իրանը և Չինաստանը…
Սերգեյ Շաքարյանց
