Հյուսիսային Իրաքում հարձակումների թիրախները Իսրայելի գործակալներն ու ԱՄՆ-ի և Թուրքիայի զինվորականներն էին

Մի յուրահատուկ պրոքսի-պատերազմ է սրվում՝ Հայաստանին և Արցախին շատ մոտ տարածքում. պատերազմող կողմերը քաջ հայտնի են բոլորին: Ապրիլի 13-ին Իրաքի աղբյուրները հաղորդեցին, որ որոշ ուժեր հարձակվել են «Մոսադ» Իսրայելի հատուկ ծառայության շտաբի վրա երկրի հյուսիսում: Ապրիլի 15-ին այս հետախուզական-դիվերսիոն գործողության նոր մանրամասները հրապարակվեցին, և հենց այդ ուժերը նույնիսկ հրապարակեցին մի շարք սպանված սիոնիստների անուններ: Այսպիսով, Իրաքի անվտանգության ծառայության որոշակի աղբյուր իրանական «Saberin News» ինտերնետային ռեսուրսին հայտնեց «Մոսադի» շտաբի վրա իրականացված հարձակման նոր մանրամասներ: Հարձակումը կատարվել է Իրաքյան Քրդստանի վարչական կենտրոն Էրբիլում (Արբելա), որտեղ իսրայելցի գործակալներն իրենց ազատ և անկաշկանդ են զգում: Ավելին, իսրայելցիները Սորանի քրդական ցեղի և նրանց առաջնորդների՝ Մասուդ Բազրանիի տոհմի ամենախանդավառ «պահապաններից» և «խնամակալներից» են: Ըստ «Saberin News»-ի՝ վկայակոչելով իրաքյան վերոհիշյալ աղբյուրը, հարձակման արդյունքում սպանվել ու վիրավորվել են ​​«Մոսադի» 10 սիոնիստական գործակալներ:

Իրաքյան աղբյուրը պնդում է, որ պարզվել է սպանված իսրայելցիներից երեքի ինքնությունը: Այս սիոնիստ սպաներն արդեն մի քանի ամիս հետախուզական գործունեություն են ծավալում Էրբիլի «Մոսադի» կենտրոնում, հաստատում է «Saberin News»-ը՝ հաղորդելով, որ «մանրամասն տեղեկություններ կան «Մոսադի» հետախուզական կենտրոնների և գործունեության մասին, որոնք անհրաժեշտության դեպքում կբացահայտվեն»: Աղբյուրները հայտնում են նաև, որ իսրայելական ռեժիմի «Մոսադ» լրտեսական գործակալության հետ կապված կառույցը երկրի հյուսիսում հարձակման է ենթարկվել «դիմադրության անհայտ ուժերի» կողմից: Իսկ միջազգային լրատվամիջոցները նշում են, որ Իրաքի հյուսիսում միջադեպը տեղի է ունեցել Պարսից ծոցում գտնվող Ալ Ֆուջեյրա քաղաքում (ԱՄԷ) իսրայելական նավի վրա հարձակվելուց մի քանի ժամ անց: Հայաստանի ընթերցողները, ովքեր հետևում են մեր վերլուծական հետաքննությանը, ակնհայտորեն պետք է հիշեն, որ 2021 թ. ապրիլի վերջին օրերին Իրանի և Իսրայելի միջև գործնականում՝ գրեթե ռազմական իրավիճակ է:

Բայց սա՝ դեռ ամենը չէ: Գրեթե միաժամանակ Էրբիլում «Մոսադ» իսրայելական հատուկ ծառայության կենտրոնի վրա հարձակմանը զուգահեռ, Հյուսիսային Իրաքում հարձակման են ենթարկվել նաև ԱՄՆ-ի և Թուրքիայի զինված անձնակազմերը: Ապրիլի 14-ին պայթուցիկով հագեցած անօդաչու սարքը (ԱԹՍ) հարձակվել է Էրբիլում գտնվող ԱՄՆ-ի նույն ավիաբազայի վրա, որը իրանական հրթիռները խոցել էին 2020 թ. հունվարի 8-ին: Ըստ Իրաքի Քրդստանի տարածաշրջանային կառավարության ՆԳՆ-ի և ԱՄՆ-ի գլխավորած կոալիցիայի, Էրբիլի օդանավակայանի վրա, որը նույնպես ծառայում են որպես ամերիկյան զորքերի հենակետ, օդային հարձակման արդյունքում զոհեր և վիրավորներ, չեն գրանցվել, գրում է «The Wall Street Journal»-ը ապրիլի 15-ին: Տեղեկատվության համաձայն, կամիկաձե անօդաչու- ԱԹՍ բախվել է ավիաբազայի տարածքում գտնվող վառելիքի պահեստի անգարին՝ առաջացնելով հրդեհ, որը շուտով մարվել է: Իրաքում և Սիրիայում գործող ոչ մի խմբավորում դեռ չի ստանձնել հարձակման պատասխանատվությունը: Էրբիլի օդանավակայանն այս տարի երկրորդ անգամ հարվածի տակ է հայտնվել. փետրվարի 15-ին հրթիռային հարձակում է իրականացվել օդանավակայանի հարակից տարածքում և հարակից ռազմաբազայում, որտեղ տեղակայված են ամերիկյան զորքերը: Հրետակոծության արդյունքում զոհվել է մեկ օտարերկրյա քաղաքացիական կապալառու և վիրավորվել առնվազն 9 մարդ, այդ թվում՝ մեկ ամերիկացի զինվոր: Հարձակման պատասխանատվությունը ստանձնեց «Սարայա Ավլիա ալ-Դամ» խմբավորումը, որը, ըստ Իրաքի իշխանությունների, վայելում է Իրանի աջակցությունը: Ջո Բայդենի Սպիտակ տուն գալուց ի վեր Իրաքում իրականացվել են ավելի քան 40 հրթիռային հարձակումներ, որոնց թիրախում են՝ ԱՄՆ զինված անձնակազմը և ԱՄՆ դիվանագիտական ​​օբյեկտները: Օրինակ՝ մարտի սկզբին ամերիկացի քաղաքացիական մասնագետը մահացավ սրտի կաթվածից, երբ Իրաքի արեւմտյան անապատում գտնվող «Այն ալ-Ասադ» բազայի վրա հրթիռային հարձակում կատարվեց: Դա տեղի է ունեցել հարևան Սիրիայում սահմանային հենակետը ռմբակոծելուց ընդամենը օրեր անց, որը, Պենտագոնի խոսքերով, օգտագործվում էր իրանական կողմից աջակցվող զինված խմբավորումների կողմից, որոնք մասնակցում են Իրաքում հրթիռային հարձակումներին: Բայդենը Սիրիայում փետրվարի 25-ի օդային հարձակումը անվանել է՝ «նախազգուշացում» Իրանին:

Որոշ այլ մանրամասներ են հաղորդում նաև այլ աղբյուրներ, օրինակ`«Ալ-Մոնիտոր» տեղեկատվական-վերլուծական պորտալը (կենտրոնը՝ Վաշինգտոնում) հաղորդում է, որ ապրիլի 14-ին առնվազն մեկ պայթյուն է տեղի ունեցել Էրբիլի միջազգային օդանավակայանում: Խոսքը հենց պայթուցիկ նյութերով լի ԱԹՍ-ի օգտագործման մասին է: Բայց «Ալ-Մոնիտորը» մի բան է ավելացնում, որի մասին «Saberin News»-ը և «The Wall Street Journal»-ը լռում են. պարզվում է, որ գրեթե միաժամանակ հրթիռային հարված է իրականացվել դեպի հյուսիս, Էրբիլից մոտ 65 կմ հեռավորության վրա, որի արդյունքում սպանվել է թուրք զինվոր և վիրավորվել է տեղի մեկ բնակիչ: Ըստ Անկարայի, հրթիռային հարվածն իրականացվել է «Կատյուշա» տիպի կայանքից՝ Իրաքի Մոսուլից դեպի հյուսիս-արևելք գտնվող Բաշիկա գյուղավանի մոտակայքում գտնվող ռազմական օբյեկտի վրա: Այս դեպքերից, ոչ մեկում դեռ պարզ չէ, թե ով է իրականացրել հարձակումները: Նախկինում ՆԱՏՕ-ն խոստացել էր զգալիորեն ավելացնել Իրաքում իր ռազմական խորհրդատուների թիվը առաջիկա ամիսներին, քանի որ ԱՄՆ-ն ակնկալում է երկրում իր զորքերի հետագա կրճատումներ`արաբական վարչապետ Մուստաֆա Աբդ ալ-Քազեմիի վրա Իրանի կողմից աջակցվող խմբերի ճնշումը մեղմելու համար, հայտնում է «Ալ-Մոնիտոր»-ը: Եթե ԱԹՍ-ի կիրառումը հաստատվի, Էրբիլի հարձակումը կդառնա Հյուսիսային Իրաքում ԱՄՆ-ի ուժերի դեմ հարձակվող ԱԹՍ-ի առաջին հայտնի օգտագործումը, եզրակացնում է պորտալը: Ինչպես պետք է հասկանան Հայաստանի քաղաքացիները, այս սրված անկայունությունը շուտով կհասնի Անդրկովկաս, և մենք ձեզ հորդորում ենք հիշել այն բանակցությունների մանրամասները, որոնք օրերս Թեհրանում անցկացրեց Ռուսաստանի արտգործնախարար Սերգեյ Լավրովը: Եվս մի անգամ կրկնենք՝ Իրաքի հյուսիսում հարձակումների թիրախները իսրայելցի գործակալներն էին, ինչպես նաև ԱՄՆ–ի և Թուրքիայի զինվորականները:

Սերգեյ Շաքարյանց