Տարածաշրջանային ագրեսորները

Խաղաղության պահպանումը տարածաշրջանում կարևորագույն գործոններից է, որը խախտելու նախապատրաստությունները սկսվել էին ամիսներ առաջ։

Ադրբեջանը երեկ վաղ առավոտյան՝ Թուրքիայի հովանավորությամբ լայնածավալ հարձակում սանձազերծեց Արցախի սահմանների և խաղաղ բնակչության նկատմամբ։ Ռազմական գործողությունների այս ծավալով բռնկումն անհնարին կլիներ առանց Թուրքիայի մասնակցության։ Թուրք-ադրբեջանական դուետը դիմեց փոքրիկ խորամանկության՝ անուղղակիորեն սպառնալով Հայաստանի սահմաններին։

Արցախի Հանրապետության միջազգայնորեն ճանաչված չլինելու փաստը մեծ խաղաքարտ է Թուրքիայի ձեռքում, քանզի ՀԱՊԿ-ի միջամտությունը հնարավոր կլիներ միայն Հայաստանի սահմաններին ուղղակիորեն սպառնալու դեպքում։

Այսուհանդերձ, խնդիրը դիտարկվում է տարածաշրջանային անվտանգության տեսանկյունից, քանզի Արցախի սահմաններին ուղղված սպառնալիքն ապակայունացնում է իրավիճակը ողջ տարածաշրջանում։

Արդեն հնչել են բազմաթիվ կազմակերպությունների կոչ-հորդորները՝ ռազմական գործողությունները դադարեցնելու մասին։ Տարբեր պետությունների ղեկավարներ իրենց մտահոգություններն են հայտնել ստեղծված իրավիճակի առթիվ։

Ինչպես ՀԱՊԿ-ը, այնպես էլ ՆԱՏՕ-ն, լինելով ռազմական խոշոր կառույցներ, միտված են ապահովելու ողջ աշխարհի անվտանգությունը՝ յուրաքանչյուրն իր տարածաշրջանում։

Թուրքիան՝ որպես ՆԱՏՕ-ի անդամ պետություն, պետք է չեզոքություն պահպանի ղարաբաղա-ադրբեջանական շփման գծում։ Սույն գործողությամբ Թուրքիան լիովին կարտահայտի աշխարհի երկու խոշոր ռազմական կառույցների իրական նպատակները, քանզի երկուսի գլխավոր առաքելությունն էլ խաղաղության և անվտանգության պահպանումն է տարածաշրջանում։

Հ.Գ. Ինչպես նախկին, այնպես էլ ներկայիս վարվող ագրեսիվ քաղաքականության հետևանքով Սաուդյան Արաբիան կասեցրել է թուրքական բոլոր տեսակի ապրանքների ներկրումը։

Հ.Գ.Գ. Ցանկացած պետություն, որ կխարխլի մարդկության խաղաղ ապրելու իրավունքը, պետք է արժանանա կոշտ գնահատականի ողջ աշխարհի կողմից։

Խաղաղ եղե՛ք…

Վերլուծաբան, «Հայրենիք» կուսակցության անդամ Լևոն Մնացականյանի ֆեյսբուքյան էջից