Ալեքսիս Օհանյան. Որպես Reddit-ի խորհրդի անդամ՝ ես հրաժարական եմ տվել, և հորդորել եմ իմ տեղը լրացնել սևամորթ թեկնածուով
Հայազգի գործարար, Reddit կայքի և InitializedCapital վենչուրային ընկերության համահիմնադիր Ալեքսիս Օհանյանը հեռանում է Reddit-ի խորհրդից՝ առաջարկելով իր փոխարեն նշանակել սևամորթ թեկնածուի: Նա այս մասին հայտնել է Ինտագրամի իր էջում:
«Ես հիմնադրեցի Reddit-ը 15 տարի առաջ՝ օգնելու մարդկանց գտնել համայնք և պատկանելության զգացում: Վաղուց արդեն ժամանակն է ճիշտ բան անելու: Սա անում եմ ինձ համար, իմ ընտանիքի ու երկրի համար: Ես սա ասում եմ որպես հայր, որը պետք է կարողանա պատասխանել իր սևամորթ դստերը, երբ նա հարցնի, թե ես ինչ եմ արել: Որպես Reddit-ի խորհրդի անդամ՝ ես հրաժարական եմ տվել, և հորդորել եմ իմ տեղը լրացնել սևամորթ թեկնածուով»,-ասել է Օհանյանը:
Նա նաև նշել է, որ Reddit-ի բաժնետոմսերի հետագա շահույթը կօգտագործի սևամորթ համայնքին ծառայելու համար՝ զսպելու ռասայական ատելությունը: Գործարարը կոչ է արել՝ կանգ չառնել:
