Իրանում հայրը «հանուն պատվի» գլխատել է 14-ամյա դստերը. Ռոհանին կոչ է արել արգելել «հանուն պատվի» սպանությունները

Իրանի 14-ամյա բնակիչ Ռոմինա Աշրաֆին դարձել է այսպես կոչված «հանուն պատվի»  գործված սպանության զոհ, գրում է The Guardian-ը՝ մանրամասնելով, որ հոր կողմից դեռահասի սպանության դեպքը երկրում բողոքի մեծ ալիք է բարձրացրել:

Նախագահ Հասան Ռոհանին կոչ է արել օպերատիվ քայլեր ձեռնարկել ու արգելել «հանուն պատվի»  սպանությունները:

Աղբյուրը նշում է, որ Աշրաֆիի հայրը դստերը սպանել է, երբ վերջինս փախել է 34-ամյա ընկերոջ հետ: Դեպքը տեղի է ունեցել Թալեշ քաղաքում:

Հայրը՝ Ռեզա Աշրաֆին, որն այժմ ձերբակալված է, քնած դստերը մանգաղով գլխատել է:

Աղջիկը տղամարդու հետ տնից փախչելուց  հետո հայտնաբերվել է հինգ օր անց ու ոստիկանական բաժանմունք տարվել: Հայրն այնտեղից նրան տուն էր տարել՝ չնայած դեռահասը ոստիկաններին ասել էր, որ վախենում է հոր կատաղի արձագանքից:

Աղջկա սպանությունից հետո Իրանում բողոքի մեծ ալիք է բարձրացել: Համացանցի օգտատերերի մեծ մասը դատապարտել է դաժան սպանությունը:

Աղբյուրը նկատում է, որ Մերձավոր Արևելքի ավանդական հասարակություններում, այդ թվում՝ Իրանում, տղամարդու հետ տնից փախած աղջիկներին երբեմն սպանում են ընտանիքի պատիվը գցելու համար:

Աղբյուրը՝ Թերթ.ամ