Թրամփի հաղորդագրությունը «Թվիթերը» կեղծ է որակել
Օգտատերերի փաստերը ստուգելու ավտոմատ կոչը հայտնվել է ԱՄՆ նախագահ Դոնալդ Թրամփի «Թվիթերի» հաղորդագրության տակ, որտեղ նա ասել է, որ փոստով քվեարկելը հանգեցնում է էական խարդախությունների:
Թրամփի հաղորդագրությունը բաղկացած է երկու մասից, նրանցից յուրաքանչյուրի ներքևում այժմ կա կապույտ շրջանակի մեջ առված կապույտ բացականչական նշան՝ այսպիսի մակագրությամբ. «Փոստի միջոցով դիտեք քվեարկության վերաբերյալ փաստերը»: Այս հաղորդագրության մեջ հղումը տանում է դեպի «Թվիթերի» հատուկ էջ, որտեղ տեղակայված է Politico պարբերականի հոդվածի հղումը՝ «Թրամփը անհիմն հայտարարություններ է անում, թե փոստով քվեարկելը հանգեցնում է արդյունքների կեղծմանը» վերնագրով:
Սրան հաջորդում է «Թվիթերի» երեք կետերի հակիրճ նկարագություն, որտեղ նշվում է, թե ինչն է սխալ ասել Թրամփը, իսկ հաջորդիվ ներկայացված է նույն թեմայի վերաբերյալ հրապարակումների ընտրանի:
Այդ ամենից հետո Սպիտակ տան ղեկավարը մեղադրել է «Թվիթերին» նախագահական ընտրություններին միջամտելու և խոսքի ազատությունը ճնշելու մեջ: «Թվիթերը» հիմա էլ խառնվում է 2020 թվականի նախագահական ընտրություններին: Նրանք հիմնվելով CNN-ի, Washington Post-ի և Amazon- ի տարածած կեղծ լուրերի վրա՝ ասում են, որ փոստային քվեարկության մասին իմ խոսքերը, թե այն կհանգեցնի համատարած կոռուպցիայի և կեղծիքների, իրականությանը չեն համապատասխանում: «Թվիթերն» ամբողջովին խեղդում է խոսքի ազատությունը, և ես՝ որպես նախագահ, թույլ չեմ տա, որ դա տեղի ունենա»,- գրել է նա:
ԱՄՆ նախագահը քննադատում է փոստով քվեարկելու պրակտիկան՝ հիմք ընդունելով նոյեմբերին կայանալիք ընդհանուր ընտրություններում քվեաթերթիկները բոլոր նահանգային ընտրողներին ուղարկելու՝ Կալիֆորնիայի նահանգապետ Դեմոկրատ Գավին Նյուսոմի մտադրությունը: Թրամփի խոսքով՝ նման քվեարկությունը թափանցիկ չէ, քվեաթերթիկները կեղծ են և ստորագրվում են ուրիշների համար:
Հանրապետական կուսակցությունը նույնիսկ դատական հայց է ներկայացրել`վիճարկելով քվեարկության այս մոտեցումը: Հանրապետականները կարծում են, որ Նյուսոմի որոշումը միայն դեմոկրատների լայնածավալ ծրագրի մի մասն է՝ նոյեմբերի 3-ին կայանալիք նախագահական ընտրություններում քվեարկությունը կեղծելու համար:
