Դարձյալ գազի պայթյուն Ռուսաստանի բազմաբնակարան շենքերից մեկում
ՌԴ Ռոստովի երկրամասի Շախտի քաղաքի իննհարկանի բազմաբնակարան շենքում գազի պայթյուն է որոտացել։ Այս մասին հայտնել են ռուսաստանյան ԶԼՄ-ները։
Նախնական տեղեկություններով, զոհվել է մեկ կին, յոթ մարդ տուժել է, նրանց թվում՝ երկամյա երեխա։ Փրկարարները տարհանել են 140 մարդու, չորսի ճակատագիրը դեռևս անհայտ է։
Մասամբ փլուզված շենքի տարածքում մտցվել է արտակարգ իրավիճակների ռեժիմ, փակվել է փողոցը։ Դեպքի վայր են ժամանել մարզպետ Վասիլի Գոլուբևը, երկրամասի դատախազ Յուրի Բարանովը։
Իրավիճակը մեկնաբանել են ՌԴ նախագահ Վլադիմիր Պուտինը և վարչապետ Դմիտրի Մեդվեդևը։ Նախագահը հանձնարարել է համակողմանի աջակցություն ցուցաբերել տուժածներին և պարզել պայթյունի պատճառները։
Իր հերթին, վարչապետը հանձնարարել է փրկարարական աշխատանքների ավարտից հետո շենքում իրականացնել ամբողջական հետազոտություն: