Լոնդոնը կօգնի Էր-Ռիադին՝ հութիների հետ հակամարտությունում ինքնաթիռների օդային լիցքավորման հարցում
Մեծ Բրիտանիայի վարչապետ Էնդի Բերնհեմը երեքշաբթի գիշերը հայտարարել է, որ Լոնդոնը օգնություն կցուցաբերի Էր-Ռիադին՝ Եմենի հութիների հետ հակամարտության ընթացքում օդում ինքնաթիռների լիցքավորման հարցում, գրում է The Guardian-ը։
«Մենք Սաուդյան Արաբիայից ստացել ենք ռազմական աջակցության խնդրանք, և ես համաձայնել եմ օդում լիցքավորման խնդրանքին», – լրագրողներին ասել է Բերնհեմը, նրան մեջբերում է թերթը։
Հրապարակման համաձայն՝ Բերնհեմը հայտնել է, որ համաձայնել է Էր-Ռիադի խնդրանքին՝ օդում լիցքավորել սաուդական ինքնաթիռները, այդ թվում՝ էներգետիկ ենթակառուցվածքը պաշտպանելու և Պարսից ծոցից նավթի անխափան մատակարարումներն ապահովելու համար՝ «գլոբալ տնտեսական անկայունությունը մեղմելու» նպատակով։
Երկուշաբթի Bloomberg-ը, հղում անելով իր աղբյուրներին, հաղորդել է, որ Մեծ Բրիտանիան հակված է օգնել Սաուդյան Արաբիային հութիների հետ հակամարտության մեջ։
Ավելի վաղ գործակալությունը նաև փոխանցել էր, որ Էր-Ռիադի հարցմանն ի պատասխան Բերնհեմը համաձայնել է թագավորություն գործուղել ռազմական խորհրդականների, սակայն որևէ պարտավորություն չի ստանձնել այլ ռազմական օգնություն ուղարկելու վերաբերյալ։
Էր-Ռիադը նաև բազմիցս օգնություն էր խնդրել ԱՄՆ-ից, սակայն Վաշինգտոնը սահմանափակվել է հետախուզական տվյալներ փոխանցելու խոստումով։ Միևնույն ժամանակ, ԱՄՆ Պետդեպարտամենտը կոնգրեսին տեղեկացրել է Սաուդյան Արաբիային 48 F-35 կործանիչ-ռմբակոծիչ մատակարարելու ծրագրերի մասին։
