Մեծ Բրիտանիան խորհուրդ է տալիս չայցելել Իրան և երկիրը լքել նաև Հայաստանով
Մեծ Բրիտանիայի Արտաքին գործերի և Համագործակցության նախարարությունը խորհուրդ է տալիս չայցելել Իրան։ Գերատեսչությունը նաև հայտնել է, որ Թեհրանում Մեծ Բրիտանիայի դեսպանատունը շարունակում է աշխատել հեռավար ռեժիմով։
«Եթե դուք Մեծ Բրիտանիայի քաղաքացի եք և արդեն գտնվում եք Իրանում՝ որպես բնակիչ կամ զբոսաշրջիկ, մանրակրկիտ գնահատեք այնտեղ մնալու անհրաժեշտությունն ու դրա հետ կապված ռիսկերը։
Հետևեք տեղական և միջազգային լրատվամիջոցներին՝ ամենաթարմ տեղեկություններն ստանալու համար։
Խուսափեք անվտանգության և ռազմական օբյեկտների հարակից տարածքներից։ Շարունակաբար վերանայեք երկրից մեկնելու ձեր ծրագրերը», – նշվում է հաղորդագրությունում։
Գերատեսչությունը նաև ընդգծել է, որ Մեծ Բրիտանիայի այն քաղաքացիները, որոնք ցանկանում են Իրանից մեկնել Հայաստանով, Հայաստանի տարածքում մինչև 180 օր գտնվելու համար վիզայի կարիք չունեն։
