Պենտագոնը վստահեցրել է, որ Թրամփի իշխանության գալը չի ազդի Ուկրաինային միջազգային օգնության վրա
ԱՄՆ նորընտիր նախագահ Դոնալդ Թրամփի վարչակազմի իշխանության գալը չի ազդի Ուկրաինային զենքի մատակարարումների համակարգման համար արևմտյան երկրների խմբի աշխատանքի վրա։ Այս մասին երեքշաբթի օրը կայացած ճեպազրույցում ասել է Պենտագոնի բարձրաստիճան ներկայացուցիչը, փոխանցում է ՏԱՍՍ-ը։
«Ես չեմ կարող խոսել այն մասին, թե հաջորդ վարչակազմը ինչ կորոշի իր դերի մասին (միջազգային դոնորների խմբի շրջանակներում), բայց ես մեծ վստահություն ունեմ Եվրոպայի հանձնառության, կարողությունների, փորձի և առաքելության հանդեպ», – ասել է նա:
Պենտագոնի ներկայացուցիչը վստահություն է հայտնել, որ Ուկրաինայի ռազմական հնարավորությունների ամրապնդմանն ուղղված արևմտյան երկրների աշխատանքը այս կամ այն ձևով կշարունակվի։
Հունվարի 9-ին Գերմանիայի Ռամշտեյն ավիաբազայում կկայանա Ուկրաինային սպառազինությունների մատակարարումը համակարգող արևմտյան երկրների խմբի 25-րդ հանդիպումը։ Դրան կմասնակցի ԱՄՆ պաշտպանության նախարար Լլոյդ Օսթինը։
