Գյումրու քաղաքապետի պաշտոնակատար կնշանակվի Սարիկ Մինասյանը
Գյումրիում դեկտեմբերի 8-10-ը կայացած նախնական ընտրությունների արդյունքում Գյումրու քաղաքապետի պաշտոնակատար կնշանակվի Սարիկ Մինասյանը։ Նա ստացել է 253 ձայն։
Նախնական ընտրությունների քվեաթերթիկների ընդհանուր թիվը եղել է 1050, անվավեր քվեաթերթիկների թիվը` 34, անճշտությունները` 11։ Ձայները թեկնածուների մեջ բաշխվել են հետևյալ կերպ.
- Անանյան Լևոն 91
- Առուշանյան Դավիթ 220
- Արամյան Շավարշ 88
- Մինասյան Սարիկ 253
- Վարդանյան Էմմա 113
- Մկրտչյան Վահագն 138
- Սարուխանյան Կարեն 143։
Սարիկ Մինասյանը ծնվել է 1980թ․, Գյումրիում։ Նա անկուսակցական է։ 2018 թ. ԱԺ պատգամավոր է ընտրվել «Լուսավոր Հայաստան» կուսակցության ընտրական ցուցակով:
Հիշեցնենք, որ ՀՀ վարչապետ Նիկոլ Փաշինյանը դեկտեմբերի 4–ին իր ֆեյսբուքյան էջում հայտնել էր Գյումրու քաղաքապետի նախնական ընտրությունների մասնակիցների անունները։
Նախնական քվեարկության արդյունքներով առավելագույն ձայն ստացած թեկնածուին Փաշինյանը կնշանակի Գյումրու քաղաքապետի պաշտոնակատար:
Պարտադիր պայման էր, որ թեկնածուները ոչ միայն առնվազն վերջին 6 ամսում հաշվառված լինեն Գյումրիում, այլև լինեն ՔՊ անդամ, աջակից կամ համակիր։
Հիշեցնենք նաև` Գյումրու ավագանու «Բալասանյան դաշինքի» 14 անդամները հոկտեմբերին վայր դրեցին իրենց մանդատները։ Նրանց թվում էր նաև քաղաքապետ Վարդգես Սամսոնյանը։ Դրանից հետո ինքնաբացարկ հայտնեցին նաև դաշինքի ցուցակի բոլոր ներկայացուցիչները։
